Srağagün ictimaiyyətə təqdim olunan “Sumqayıt”ın yeni baş məşqçisi Aleksey Baqanın köməkçiləri də məlum olub.

Onun məşqçilər korpusunda Mehman Yunusov, fiziki hazırlıq üzrə məşqçi Gerard Merino, qapıçılarla çalışan Emil Babayev və Vitali Taraşenko yer alacaq. Tarasenko istisna olmaqla, “üçlük” “kimyaçılar”ın sabiq çalışdırıcısı Ayxan Abbasovun da korpusunda yer almışdı. Tarasenkoya gəlincə, ukraynalı mütəxəssis artıq xeyli vaxtdı Baqanın yanındadı. O belaruslu çalışdırıcı ilə birgə BATE, “Jalgiris”, “Aktobe” və “Şaxtyor”da çalışıb.

Yeri gəlmişkən, Baqa və ailəsi Sumqayıtda yox, Bakıda qalacaq. Klubun mətbuat katibi Rəşad Məmmədovdan əldə etdiymiz bilgiyə görə, belaruslu məşqçinin paytaxtı seçməsinin səbəbi ailəsi ilə bağlıdı. Övladları ingilisdilli məktəbdə təhsil aldığından və Sumqayıtda belə təhsil ocağı olmadığından Baqa ailəsi Bakıda yaşamaq məcburiyyətindədi. Onu da qeyd edək ki, “kimyaçılar”ın yeni çalışdırıcısının xanımı da idmana yad sima deyil. O vaxtilə bədii gimnastika ilə məşğul olub. Çox maraqlıdı ki, “Kapital Bank Arena”da təşkil olunan təqdimat mərasimində xanımı həyat yoldaşını tək buraxmamışdı. O da mətbuat konfransında iştirak edirdi.

Jurnalistlərlə görüşdən sonra yeni baş məşqçi yeni komandasında ilk məşqə çıxdı. Komanda meydana çıxmamışdan öncə isə konfrans salonunda bir araya gəldi. Futbolçularla tanışlıq xarakteri daşıyan qısa görüşdə Camaləddin Xocaniyazovla Aleksey Baqanın bir-biri ilə qucaqlaşıb görüşməsi gözümüzdən yayınmadı. Bu da təsdüfi deyil. Çünki müdafiəçi ilə baş məşqçinin tanışlığı 2019-cu ildən başlayır. Həmin vaxt Baqa BATE-nin baş məşqçisi, Camaləddin isə həmin komandanın üzvü idi.

Srağagün keçirilən ilk məşq yüngül oldu. Baş məşqçi tətildən yeni dönən futbolçuları çox tərlətmədi. Komanda üzvləri daha çox yüngül qaçış və müxtəlif təmrinləri yerinə yetirmək ilə yadda qaldı. Dünən Sumqayıtda daha bir məşqə çıxan “kimyaçılar” bu gündən etibarən ünvanı dəyişəcək. Komanda qarşıdakı üç günü “Dalğa Arena”da keçirəcək. Ondan sonra isə, daha dəqiq desək, yanvarın 13-də “gənclik şəhəri” təmsilçisi Türkiyəyə yollanacaq.

Türkiyədən söz düşmüşkən, “Sumqayıt”ın qardaş ölkədə yoxlama görüşü keçirəcəyi ilk rəqibin adı bəlli olub. Baqanın komandası Macarıstan təmsilçisi MTK ilə üz-üzə gələcək. Uypeşt klubu ilə matç yanvarın 16-da baş tutacaq. “Kimyaçılar” bundan başqa toplanış çərçivəsində daha iki görüş keçirməyi planlaşdırır. Ancaq 19-u və 22-də keçiriləcək qarşılaşmalarda rəqibin kim olacağı hələ müəyyənləşməyib.

RƏŞAD