Lionel Messi koronavirusdan sağalıb.

O, artıq PSJ-nin bazasında məşqlərə başlayıb.
Argentinalı hücumçunun hələ ki ümumi qrupdan ayrı məşq etdiyi bildirilib. Onun Fransa çempionatının 20-ci turunun yanvarın 9-da “Lion”la keçiriləcək oyununda iştirak edib-etməyəcəyinə aydınlıq gətirilməyib.

Lionellə bağlı yayılan digər xəbər daha maraqlıdı. Argentina yığmasının kapitanı DÇ-2022-nin qarşıdakı iki oyununu buraxa bilər. Fransa mənbələrinin yaydığı xəbərə görə, milli komandanın baş məşqçisi Lionel Skaloni Messiyə Çili (27 yanvar) və Kolumbiya (1 fevral) ilə matçlarda iştirak etməməyi təklif edib. O, buna səbəb kimi 34 yaşlı futbolçunun koronavirusdan yenicə sağalmasını göstərib. Hazırda fərdi planda məşq edən hücumçu qeyri-adi təklif barədə düşünmək üçün məşqçidən vaxt istəyib. Qeyd edək ki, Argentina yığması artıq DÇ-2022-nin final mərhələsinə vəsiqəni təmin edib.