“CBC Sport” da futzal üzrə AÇ-ni yayınlamaq istəyib - AÇIQLAMA
Futzal üzrə Avropa çempionatının final mərhələsi İTV vasitəsilə yayınlanacaq.
Adətən, indiyədək belə yarışları "CBC Sport"un yayınladığının şahidi olmuşuq. Bəs idman telekanalı bu dəfə niyə geri çəkilib? Bu suala cavab tapmaq üçün "CBC Sport"un Xəbərlər Xidmətinin direktoru Şəmsəddin Abbasovla danışdıq:
"Yayın hüququnu kim alırsa, o da yayınlayır. Biz də müraciət etmişdik. Amma görünür, İTV-nin təklifi daha cəlbedici olub".
Məsələ ilə bağlı İTV-nin də mövqeyini öyrəndik. Telekanalın İdman Departamentinin rəhbəri Kənan Hakimovu dinləyək:
"Öncə bildirim ki, ötən ilin payızında keçirilən futzal üzrə dünya çempionatının final mərhələsinin oyunlarını telekanal və saytımız vasitəsilə tamaşaçılara təqdim etmişik. Avropa çempionatının final mərhələsinə gəlincə, yayınçı şirkətlə bununla bağlı müzakirə aparanda, millimizin Avropa çempionatının final mərhələsinə vəsiqə qazanacağı təqdirdə turnirin yayın hüququna yiyələnməklə bağlı istəyimizi bildirmişdik. Xoşbəxtlikdən yığmamız qarşıya qoyulan hədəfin öhdəsindən gəldi".
Yeri gəlmişkən, Niderlandda keçiriləcək Avropa çempionatının oyunlarına azarkeşlər buraxılmaya bilər. Bu haqda vesti.kz saytı məlumat yayıb. Səbəb Niderlandda koronavirusun “omikron” ştamının yayılma riskinin yüksək olması və karantin rejiminin tətbiqidi. Qitə birinciliyinin təxirə salınması da istisna olunmur. Yarışla bağlı yekun qərar yanvarın 10-dək açıqlanacaq.
Qeyd edək ki, milli komandamız D qrupunda Bosniya və Hersoqovina, Gürcüstan və İspaniya ilə üz-üz gələcək. Yanvarın 19-dan fevralın 6-dək keçiriləcək AÇ-yə ilk dəfə 16 komanda qatılacaq.
GÜNAY VƏLİYEVA
