Premyer-liqada çıxış edən komandalar təlim-məşq toplanışına başlayıb.

"Football-plus.az" saytı olaraq sizi klubların qış hazırlıq planı ilə tanış edirik:

"Qarabağ"

Komanda yanvarın 5-də Bakıda məşqləri bərpa edəcək. Hazırlığın 2-ci mərhələsi Antalyada baş tutacaq. Ayın 12-də qardaş ölkəyə yollanacaq ağdamlılar "Gloria Sports Arena"da məskunlaşacaq. "Qarabağ" yanvarın 14-də "Qaz Metan" (Rumıniya), 21-də "Şlyonsk" (Vrotslav/Polşa), 25-də isə “Visla" (Krakov/Polşa) ilə qarşılaşacaq. Yanvarın 21-i və 25-də daha iki oyun nəzərdə tutulub. Ağdam təmsilçisi səhər saatlarında Serbiyanın "Batska Topola" və Slovakiyanın "Tatran" klubları ilə üz-üzə gələcək. Antalya toplanışı yanvarın 26-da başa çatacaq.


"Sabah"

Antalyada təlim-məşq toplanışında olacaq “Sabah”ın hazırlıq çərçivəsində qarşılaşacağı rəqiblərdən ikisi bəllidi. Komanda yanvarın 15-də Macarıstan “Pakş”ı, 25-də isə Serbiya “Mladost”u (Luçani) ilə qarşılaşacaq. Türkiyə toplanışı çərçivəsində daha bir oyunun keçirilməsi nəzərdə tutulub. Rəqiblə bağlı qarşıdakı günlərdə məlumat veriləcək. Qeyd edək ki, Antalya toplanışı 12-26 yanvar tarixini əhatə edəcək.

"Sumqayıt"

3-cü dövrənin hazırlığına yanvarın 5-də Sumqayıtda start verəcək. Komanda hazırlıq prosesinin ikinci mərhələsini Antalyada keçirəcək. Yanvarın 12-dən 23-dək Lara bölgəsində yerləşən “Aska Resort” otelində məskunlaşacaq “Sumqayıt” bu müddətdə 3 yoxlama oyununda qüvvəsini sınayacaq. Rəqiblərin adı yaxın günlərdə açıqlanacaq.

"Qəbələ"

“Qırmızı-qaralar” 2021/22 mövsümünün ikinci yarısının hazırlığına yanvarın 6-da start verəcək. Elmar Baxşıyevin yetirmələri məşqlərə Bakıda çıxacaq. Bakı toplanışı çərçivəsində yoxlama oyununun keçirilməsi nəzərdə tutulmayıb. “Qəbələ” yanvarın 15-də Türkiyəyə yollanacaq. “Qırmızı-qaralar” Antalyanın Bələk bölgəsindəki “İC Santai” otelində məskunlaşacaq. Ayın 25-dək davam edəcək hazırlıq çərçivəsində 3 yoxlama matçı baş tutacaq. Bu qarşılaşmalar yanvarın 17-də, 20-də və 24-də keçiriləcək. Rəqiblər hələ dəqiqləşməyib.

"Neftçi"

Hazırlığın ilk mərhələsi yanvarın 5-dən 9-dək Bakıda baş tutacaq və fiziki hazırlığa həsr olunacaq. Əsasən taktiki çalışmalardan ibarət təlim-məşq toplanışının ikinci mərhələsi isə yanvarın 10-dan 25-dək Türkiyədə olacaq. Antalya şəhərinin Manavqat bölgəsindəki “The Sense De Luxe” otelində məskunlaşacaq flaqman qardaş ölkədə 3 yoxlama görüşü keçirməyi planlaşdırır. “Ağ-qaralar” yanvarın 14-də Macarıstanın “Kişvarda”, 19-da Polşanın “Visla” (Plotsk) klubu ilə qarşılaşacaq. 24-dəki rəqib hələ dəqiqləşməyib.

"Keşlə"

Yanvarın 6-da bir araya gələcək. Qış fasiləsində növbəti yarımilin hazırlığı Bakıda başlayacaq. Yanvarın 6-da bir araya gələcək komanda 14-ü və 20-də yoxlama oyunları keçirməyi planlaşdırır. Rəqiblər barədə məlumat yaxın zamanda veriləcək.

"Zirə"

Yanvarın 2-də Bakıda təlim-məşq toplanışına başlayan komanda artıq bu gün Antalyaya yola düşüb. "Qartallar" “İC Green Palace” otelində məskunlaşacaq. Qonşu ölkədə 3 yoxlama oyunu planlaşdırılıb. Yanvarın 13-də rəqib Macarıstanın “Peç”, 20-də Polşanın “Qurnik” (Leçna), 24-də isə Şimali Makedoniyanın “Breqalniça” klubları olacaq. "Zirə” yanvarın 25-də Bakıya dönəcək.

"Səbail"

Komanda yanvarın 5-də "ASCO Arena"da məşqlər başlayacaq. Ayın 10-da isə "Dalğa Arena"da təlim-məşq toplanışı başlayacq. Komandanın hansı klublarla yoldaşlıq oyunları keçirəcəyi hələ bəlli deyil.

GÜNAY VƏLİYEVA