"Misli.com" premyer-liqa klublarına 2,5 milyon ödəyəcək? - AÇIQLAMA
Xatırlayırsızsa, Klublar Komitəsinin son iclasından sonra AFFA-nın icraçı vitse-prezidenti Elxan Məmmədov qurumun Türkiyənin "Misli.com" şirkəti ilə müqavilə imzaladığını bildirmişdi.
Bununla bağlı yerli mediada bir sıra maraqlı xəbərlər yayıldı. Bir çoxları bildirdi ki, şirkət çempionatın sponsoru olacaq. Başqa versiyada qeyd olundu ki, hər kluba 2 milyon manat ödəyəcək.
Diqqətli oxucularımız xatırlayarlar. Ötən ilin sentyabrında, hələ bu məsələ ilə bağlı rəsmi məlumat verilməmişdən öncə "Futbol+" qəzeti bu xəbərini diqqətinizə çatdırmışdı. 3 ay öncə AFFA-nın bir sıra yeniliklər edəcəyini, premyer-liqanın formatının dəyişəcəyini, U-23 liqasını yaradacağını, Türkiyənin "Demirören Holdinq"inə daxil olan şirkətlərin biri ilə müqavilə imzalayacağını, onların ölkə çempionatının sponsoru olacağını, bundan əlavə həmin kompaniyanın əsas liqada çıxış edən klublara 2,5 milyon manat ödəcəyini bildirmişdik.
İndi xəbərimiz təsdiqlənmək üzrədi. Federasiya artıq "Misli.com"la müqavilə imzalamaq ərəfəsindədi. Bunu rəsmi olaraq açıqlayıb. Görəsən, şirkət premyer-liqanın sponsoru olacaq? Vəd olunan məbləğ klublara veriləcək?
Suallarımızı PFL-in mətbuat və İctimaiyyətlə Əlaqələr Departamentinin rəhbəri Aslan Şahgəldiyevə ünvanladıq:
"Misli.com"la rəhbərlik səviyyəsində müəyyən danışıqlar aparılır. Detallarla bağlı məndə hələ ki, heç bir məlumat yoxdu. Hansısa komandaya pul verilib-verilməyəcəyi, çempionatın adının dəyişdirilib-dəyişdirilməyəcəyi bağlı dəqiq və detallı informasiyam yoxdu. İnşallah, hər şey uğurlu və qaydasında olarsa, bundan sonra suallarınıza konkret cavab verə bilərəm. Bu günə məndə hansısa informasiya yoxdu".
İLKİN SULTANLI
