''Qalatasaray'' olduqca üzücü bir mövsüm keçirməkdə davam edir.

Komanda ilk dövrəni 27 xalla 10-cu pillədə başa vurdu. 19 tura 27 xal Fatih Terim dönəminin ən zəif göstəricisidi. Bu azmış kimi İstanbul nəhəngi Türkiyə kubokunda da öz meydanında 1-ci liqanın autsayderlərindən olan ''Dənizlispor''a penaltilər seriyasında yenilərək mübarizəni artıq 1/16 finalda dayandırmalı oldu! ''Cim-Bom''un ardıcıl 3-cü mövsümü titulsuz başa vurmaq ehtimalı yaranıb. Komanda son titulunu 2019-da ölkə superkubokunu qazanmaqla əldə edib. Düzdü, bu baxımdan əzəli rəqib ''Fənərbaxça'' ilə müqayisədə ''Qalatasaray''ın durumu qənaətbəxşdi. Belə ki, ''Fənər'' bu mövsüm də heç nə qazana bilməsə, titul həsrəti 8 ilə yüksələcək!

''Qalatasaray'' üçün yaranmış əsas təhlükə onunla bağlıdı ki, komanda gələn avrokuboklardan kənar qala bilər. Bunun baş verməməsi üçün 2 yol var. ''Aslan'' ya mövsümü ilk ''4-lük''də tamamlamalı, ya da Avropa Liqasının qalibi olmalıdı. ''Qalatasaray''ın sonuncu dəfə zəif nəticələr üzündən Avropadan kənar qaldığı mövsüm 2011/12-di. Çünki ''sarı-qırmızılar'' 2010/11-i çox bərbad keçirmişdilər.

Frank Raykaardla başlayan, George Haci ilə davam edən və Bülənt Ündərlə başa çatan həmin ''futbol ili''ni komanda 8-ci pillədə tamamlamışdı. Yəni 11 ildən sonra komanda eyni aqibəti yaşaya bilər. Düzdü, ''Qalatasaray'' 2016/17-də də Avropada oynamamışdı. Amma bu, zəif nəticələr üzündən yox, cəza üzündən baş vermişdi. O vaxt ''maliyyə feyr-pleyi''nin şərtlərini pozduğu üçün istanbullular UEFA tərəfindən avrokuboklardan birillik kənarlaşdırılmışdılar.