Hələ ki yeni baş məşqçisinə qovuşmayan “Sumqayıt” təlim-məşq toplanışı üçün Türkiyəyə yollanacaq klublarımızın sırasına qoşulub.

Əldə etdiymiz məlumata görə, qeyri-adi nəsə baş verməsə, “kimyaçılar” yanvarın 12-dən 24-nə kimi Antalyanın Lara bölgəsində hazırlıq keçəcək. “Gənclik şəhəri” təmsilçisi qardaş ölkədə üç yoxlama görüşü keçirməyi planlaşdırsa da, rəqiblərin adı hələ məlum deyil. Türkiyəyə yollanmamışdan öncə isə komanda yanvarın 5-də Sumqayıtda bir araya gələcək.

Bu arada Səid Rza ilə yolları ayıran “Sumqayıt” yeni hücumçu axtarışına çıxıb. Bəlkə də bu üzdən “Neftçi”nin forvardı, qış fasiləsində “ağ-qaralar”ın icarəyə vermək istədiyi Mirabdulla Abbasovun adı “kimyaçılar”la yanaşı hallanır. Ancaq kluba yaxın mənbədən əldə etdiyimiz bilgiyə görə, rəhbərlik Mirabdullanı icarəyə götürməyə isti yanaşmır. Buna səbəb forvardın məvacibinin yüksək olmasıdı. Mənbəmiz onu da bildirdi ki, Abbasov “Neftçi”də 12 min manat maaş alır. “Sumqayıt”ın isə belə əməkhaqqı verməyə imkanı yoxdu.

RƏŞAD, Futbol+ qəzeti