AFFA aydınlıq gətirdi - AÇIQLAMA
Canni de Byazi Yunanıstan millisinə rəhbərlik edə bilər.
Bu barədə Ellada mətbuatı xəbər yayıb. Bildirilib ki, italiyalı mütəxəssisin AFFA ilə müqaviləsinin olmasına baxmayaraq, o, Azərbaycanı tərk etməyə hazırdı. Çalışdırıcı Yunanıstan Futbol Federasiyasına təklif olunub.
Məsələ ilə bağlı AFFA-nın mövqeyini öyrəndik. Qurumun Mətbuat və İctimaiyyətlə Əlaqələr Departamentinin rəhbəri Firuz Abdullanı dinləyək:
“Canni de Byazinin guya Yunanıstan millisinə gedəcəyi ilə bağlı bir neçə mətbu orqan mənə sual ünvanlayıb. Bu məsələni, ümumiyyətlə, şərh etmək istəmirəm. Çünki assosiasiyanın sözçüsü olaraq hansısa mətbu orqanda, ümumiyyətlə, dəqiqliyinə, dürüstlüyünə, vicdanlı və keyfiyyətli olmasına heç bir əminliyimin olmadığı, tanımadığım bir media qurumunun xəbəri ilə bağlı fikir səsləndirməyim düzgün olmaz. Canni de Byazi cəmi 25 gün öncə milli komandamız ilə yeni müqavilə bağlayıb. Hər dəfə hansısa mətbuat orqanda çıxan bu cür xəbərlərə münasibət bildirməyimiz yaxşı və doğru olmaz”.
Bu arada yığmaların əcnəbi baş məşqçiləri - Canni de Byazi, Milan Obradoviç və Miloş Velebit Azərbaycanı tərk edib. Bu informasiyanı da qəzetimizə açıqlamasında Firuz Abdulla söylədi. O, hər üç şəxsin tətillə bağlı ölkələrinə yollandığını dedi:
“Onlar Azərbaycanda deyillər, vətənlərinə yollanıblar. Mənzuniyyətdədilər. Yanvarda Azərbaycana qayıdacaqlar”.
İLKİN SULTANLI
