Dünən Türkiyə çempionatında ilk dövrənin sonuncu - 19-cu turunun ilk oyunları keçirildi. Ən böyük maraq doğuran qarşılaşmada lider ''Trabzonspor''la əla formada olan ''İstanbul BŞ'' arasında keçirildi.

Görüş qolsuz başa çatdı. Başakşəhərlilər Əmrə Belözoğlunun başçılığı altında 10-cu superliqa matçında da məğlub olmadılar (8 qələbə, 3 heç-heçə). ''Trabzonspor'' isə ilk dövrəni 46 xalla tamamladı. Bu, Türkiyə çempionatında ilk dövrələr üçün rekord göstəricidi. Əvvəlki rekord 2005/06-da qeydə alınmışdı. O vaxt ''Fənərbaxça'' ilk dövrədə 45 xal toplamışdı. Amma qeyd etmək yerinə düşər ki, cari mövsüm 20 komanda ilə oynanıldığı halda 2005/06 da daxil olmaqla əvvəlki mövsümlərin böyük əksəriyyəti maksimum 18 komanda ilə oynanılıb. Yəni həmin mövsümlərdə ilk dövrə 17 turdan ibarət olduğu halda bu mövsüm ilk dövrə 19 turdan ibarət oldu.

''Qalatasaray'' isə öz meydanında ''Antalyaspor''u Sofian Fequli və Kərəm Aktürkoğlunun qolları ilə yenərək superliqada 7 oyunluq qələbəsiz seriyaya son qoydu. Komanda son qələbəsini oktyabrın 31-də ''Qaziantep''lə ev oyununda (2:0) əldə etmişdi. ''Qalatasaray''ın evdə ''Antalyaspor''a qarşı məğlubiyyətsiz seriyası 11, qol buraxmamaq seriyası 5 oyuna yüksəldi. Kərəm 46-cı superliqa matçında bir ilkə imza ataraq həm qol vurdu, həm də aktivinə məhsuldar ötürmə yazdı. Bundan başqa Fatih Terimin bu rəqibə qarşı yenilməzliyi davam etdi. Terim məşqçi karyerasında ''Antalyaspor''a qarşı keçirdiyi 21-ci matçda da məğlubiyyət acısı yaşamadı (15 qələbə, 6 bərabərlik)!