“Neftçi”nin belçikalı futbolçu Sabir Burqinlə yolları ayıracağını yazmışdıq.

Son ölkə çempionu 2-ci mövsümdü heyətində çıxış edən 25 yaşlı yarımmüdafiəçini satmağı planlaşdırır. Ancaq bu klub Sabirin mətbuatda adı daha çox hallanan "Qarabağ" olmayacaq. Belə ki, Konfrans Liqasındakı təmsilçimiz onunla, ümumiyyətlə, maraqlanmayıb. Məsələ ondadı ki, müqaviləsinin müddəti yayda bitəcək Buqrin ölkəmizdən ayrılacağını hazırkı klubuna deyib. O, "Neftçi"dən heç bir narazılığının olmadığını, sadəcə, ailəsiylə daha Azərbaycanda qala bilmədiyini, darıxdığını, burda heç bir qohumunun olmadığını bildirib. "Neftçi" onsuz da gedəcəyini qətiləşdirən futbolçunu indidən, müqaviləsinin bitməsinə 6 ay qalmış satmaq istəyir ki, maddi qazanc əldə eləsin. Mərakeş əsilli futbolçu karyerasını vətəndaşı olduğu Belçikada davam etdirmək fikrindədi. Hazırda bu ölkənin bir neçə klubuyla danışıqlar gedir və Buqrin qış fasiləsində vətəninə dönəcək. Mediada çıxan xəbərlərə görə, futbolçu ilə Türkiyənin “Antalyaspor” klubu da maraqlanıb. Qardaş ölkə təmsilçisi yarımmüdafiəçini qış fasiləsində transfer etmək istəyib. Lakin Buqrin bu təklifi rədd edib.

İnformasiya ilə bağlı klubun da mövqeyini öyrəndik. Rüstəm Allahverdiyev “Antalyaspor”un rəsmən müraciət etmədiyini dilə gətirdi.

“Neftçi” Sabirin əvəzinə əcnəbi futbolçu almağı planlaşdırmır. Buna da əsas kimi komandada orta sahədə yetirəncə oyunçunun olması göstərilir. Sabiri əvəzləməyə əsas namizəd yay transferi olan argentinalı vinger Xorxe Korrea sayılır. Bundan başqa, Sezar Meza Kolli də komandanın əsas ümidlərindən biri olacaq. Təbii ki, hər şey Buqrinin satılmasından asılıdı.

Onu da bildirək ki, "Neftçi" qış fasiləsində digər əcnəbi yarımmüdafiəçi Harramiz Sureslə də vidalaşacaq. Ancaq bu legionerlə bağlı vəziyyət tam fərqlidi. Belə ki, "ağ-qaralar" ümidləri doğrultmayaraq cari mövsümün ilk yarısını daha çox ehtiyatda keçirən 31 yaşlı futbolçunun müqaviləsini pozacaq.