''Yuve''nun daha bir əfsanəsi Ronaldonun arxasınca danışdı
''Yuventus''un əfsanələri belə desək, Kriştiano Ronaldonun arxasınca danışmaqda davam edirlər.
Daha öncə Corcio Kyellini ''Kriştianonun tez ayrılması bizim üçün daha yaxşı olardı'' demişdisə, Leonardo Bonuççi ''biz düşünürdük ki, Ronaldo ''Yuventus''a təkbaşına qələbələr qazandıracaq'' açıqlamasını vermişdi. Ünlü portuqaliyalının üçillik ''Yuve'' karyerasını uğursuz adlandırmaq olmaz.
Turin nəhəngi bu müddətdə 2 dəfə A seriyasının qalibi oldu və Ronaldo özü 100-dən çox qol vurdu. Amma komanda əsas titulu, yəni Çempionlar Liqasını qazana bilmədi. Hətta Ronaldonun hər 3 mövsümündə ''Yuve'' 1/4 finaldan uzağa gedə bilmədi. Bu dəfə Ronaldonu xatırlayan ''Yuve''nin digər əfsanəsi Canluici Buffon olub. Hazırda B seriyasında çıxış edən ''Parma''nın şərəfini qoruyan və yanvarın 28-də 44 yaşı tamam olacaq Buffon bunları deyib:
''Yuve'' Ronaldo ilə onun ilk mövsümündə, yəni 2018/19-da ÇL-i qazana bilərdi. Həmin vaxt mən PSJ-də idim. Amma həmin mövsüm nə baş verdiyini anlamadım. Sonra mən də komandaya qayıtdım və 2 il Ronaldo ilə çiyin-çiyinə oynadım. Münasibətlərimiz qaydasında idi. Amma Kriştiano ilə ''Yuve'' sanki öz DNA-sını itirdi. Biz 2017-də finala yüksələndə təcrübəli oyunçularımız var idi. Bununla yanaşı komanda şəklində güclü idik ve əsas heyət uğrunda amansız mübarizə gedirdi. Amma Ronaldo gəldikdən sonra bu özəllikləri itirdik''.
