Baş məşqçi Vitor Pereyra qovulsa da, ''Fənərbaxça''nın nəticələri və ən əsası oyunu düzəlmək bilmir.

Dünən superliqanın 18-ci turu çərçivəsində İstanbul nəhəngi ''Fatih Karagümrük''ün qonağı oldu. ''Atatürk Olimpiya''da keçirilən qarşılaşma ''Fənər'' üçün məğlubiyyətə bərabər heç-heçə (1:1) ilə nəticələnib. Belə ki, ''Fənər''in əfsanəsi Volkan Dəmirəlin çalışdırdığı ''Fatih Karagümrük'' təxminən 1 saata yaxın 9 (!) futbolçu ilə oynamaq məcburiyyətində qalıb. Düzdü, ''sarı-lacivərdlilər'' rəqibi darmadağın edəcək qədər qol epizodları yaradıblar. Təsadüfi deyil ki, meydan sahiblərinin təcrübəli qapıçısı Emiliano Viviano 13 qurtarış edərək mövsümün rekordunu müəyyənləşdirib. Amma ''Fənər'' belə bir rəqibə yalnız bir qol vurmağı bacarıb. Həmin qolu da penaltidən Məsut Özil vurub. Ünlü yarımmüdafiəçi bununla da bir ilkə imza atıb. Belə ki, Özil karyerasında ilk dəfə ardıcıl 3 çempionat oyununda qol sevinci yaşayıb. Bundan əvvəlki 2 turda o, ''Qaziantep'' və ''Beşiktaş''a da qol vurmuşdu. Qələbə həsrəti 3 oyuna yüksələn və son 9 turda cəmi 2 qələbəsi olan ''Fənərbaxça''nın lider ''Trabzonspor''la xal fərqi 16-ya çatıb!

Dünənki matçın ən diqqətçəkən məqamı ''Fənər''in baş məşqçi səlahiyyətlərini icra edən Zəki Murat Gölə ilə bağlıdı. Məsələ burasındadı ki, bu mütəxəssis daha öncə də ''Fənər''in başında 9 nəfərlə qalan rəqibi yenə bilməmək uğursuzluğunu yaşamışdı. Keçən ilin martında Ərsun Yanal istefa verdikdən sonra növbəti 2 oyunda komandanı meydana məhz bu mütəxəssis çıxarmış və hər iki oyunda qələbəyə həsrət qalmışdı. O vaxt ''Fənər'' Gölə ilə martın 7-də evdə ''Dənizlispor'' ilə 2:2 bərabərə qalmışdısa, bir həftə sonra ''Konyaspor''a səfərdə minimal hesabla yenilmişdi. Özü də Konyadakı matçın gedişində meydan sahibləri 9 futbolçu ilə qalmışdılar!