Premyer-liqanın 14-cü turunun oyunlarında hakimliklə bağlı ciddi səhvlər baş vermədi.

Ümumiyyətlə, hakimlər 4 oyunda futbolçulara 21 vərəqə göstərdi. Bunlarda 20-nin rəngi sarı, 1-nin rəngi qırmızı oldu. Turun ən centlmen komandaları meydanı vərəqəsiz tərk edən "Zirə" ilə "Keşlə"di. Həftənin ən kobud komandası isə "Qəbələ"di. "Qırmızı-qaralar"ın futbolçuları 5 sarı, 1 qırmızı vərəqə ilə cəzalandı. Reportyorlarımızın qeydlərinə keçid alaq.

Qəbələ - Neftçi, KAMAL UMUDLU
Oyun sürətli məcrada keçsə də, hakim yaxşı idarəçiliklə yadda qaldı. Qərarları yerində verir, dominantlığını ortaya qoyurdu. Düzdü, komandalar bir neçə epizodda penalti üçün etiraz etdilər. İlk hissədə Tyaqonun ötürməsindən sonra top Renatonun əlinə dəydi. Lakin müdafiəçi qolunu topdan qaçırırdı. Hakim burda doğru qərar verdi. "Neftçi"nin lehinə təyin etdiyi 11 metrlik cərimə zərbəsi də doğru idi. Renato qaydalar çərçivəsində oynamamışdı. Bir sözlə, Kamal Umudlu oyunu ideala yaxın idarə etdi. Verdiyi qərarlar və göstərdiyi vərəqələr doğru idi.

Sumqayıt - Keşlə, ƏLİYAR AĞAYEV
Qonaqların üstünlüyü şəraitində keçən matçda ölkənin ən yaxşı hakimi olan Əliyar Ağayev statusunu bir daha doğrultdu. Onun işində xüsusi və ya diqqətçəkən səhv olmadı. Ümumiyyətlə, hakimlər briqadası normal işlədi. Ağayevin əsas üstünlüyü odu ki, oyunu davam etdirməyi sevir. Yəni “üstünlük” prinsipindən uğurla yararlanır. Bu da istər-istəməz matçın tempinə təsir edir. Bir szölə, komandaların sürətli, dinamik oyun sərgiləməsinin səbəbkarı Ağayev idi.

Səbail - Sabah, ELÇİN MƏSİYEV
Baş hakim görüşdə nəticəyə təsir edən səhvə yol vermədi. Matçın tempinin aşağı düşməsinə şərait yaratmadı. Hadisələrin mərkəzində idi. Xırda-mexaniki səhvləri nəzərə almasaq, FIFA referisi oyunun öhdəsindən lazımınca gəldi. Sadəcə, 4-cü hakim Kamranbəy Rəhimov əvəzetmələr zamanı gecikməyə yol verirdi. Hətta onunla Murad Musayev arasında xırda söz dueli də yaşandı. İkinci hissədə “Sabah”ın baş məşqçisini əsəbləşdirən məqam yaşandı. Belə ki, 4-cü hakimin icazəsi olmadan “Səbail”in oyunçusu meydanda çıxdı. Özü də “Sabah”ın futbolçuları topu meydana daxil edən yerdən. Buna görə də baş məşqçi hakimə iradını bildirdi. Kamranbəy Rəhimov gənc hakimlərdəndi. Yəqin ki, səhvlərini nəzərə alıb, öz üzərində işləyəcək. Ümumilikdə isə hakimliyin səviyyəsi qənaətbəxş idi.

Qarabağ - Zirə, RƏVAN HƏMZƏZADƏ
Şəkidən olan referi oyunu sözün əsl mənasında yaxşı idarə etdi. Hətta Rəşad Sadıqov mətbuat konfransında idarəçiliyin ideal səviyyədə olduğunu bildirdi. Referi futbolçulara davranışında qətiyyətli idi. Ramil Şeydayevi sarı vərəqə ilə cəzalandırdığı məqamda İlkin Muradov səs-küy salırdı. O, futbolçunun üstünə qışqıraraq “get, işinlə məşğul ol”, - deyə vəzifəsinin öhdəsindən gəldiyini göstərmiş oldu.