''Qalatasaray'' sanki bu mövsüm iki fərqli simaya bürünüb. Bir tərəfdə avrokuboklarda son 10 matçda məğlub olmayan və AL-də qrupu lider bitirib 1/8 finala vəsiqə qazanan komanda varsa, digər tərəfdə Türkiyə çempionatında qalib gəlməkdə çətinlik çəkən və ilk dövrə tamam olmadan çempionluq şansını itirən komanda var.

Dünən superliqanın 17-ci turu çərçivəsində ''Qalatasaray'' fanatları önündə ''İstanbul BŞ'' ilə oyunda Mustafa Məhəmədin 86-cı dəqiqədə vurduğu qolla məğlubiyyətdən güc-bəla ilə qurtuldu (1:1). Bununla da ''Cim-Bom''un daxili birincilikdə qələbə həsrəti 6 oyuna yüksəldi (3 heç-heçə, 3 məğlubiyyət). Ən əsası 17 tura cəmi 24 xal toplayan İstanbul nəhəngi 42 xalı olan lider ''Trabzonspor''dan 18 xal geri düşüb! Bu, Fatih Terimin dönəmi üçün antirekorddu. ''Qalatasaray'' bu məşqçi ilə indiyə qədər heç vaxt 17-ci turdan sonra liderdən bu qədər böyük fərqlə geri düşməmişdi. Əvvəlki ən pis göstərici 2003/04 mövsümünə təsadüf etmişdi. O vaxt ''Aslan'' 17 tura 29 xal toplamış və lider ''Beşiktaş''dan 14 xal geri düşmüşdü. Terim həmin mövsümü tamamlaya bilməmiş və 26-cı turda evdə ''Çaykur Rizəspor''a məğlubiyyətdən sonra istefa vermişdi. Onu George Haci əvəzləmişdi. Ümumiyyətlə, ''Qalatasaray'' 3 xallıq sistemdə ən pis ikinci mövsümünü keçirir. Komanda 1987-dən bu yana 17 tura yalnız bir dəfə - 2010/11-də indikindən daha az (23) xal toplayıb.

Maraqlıdı ki, Terim ''Fənərbaxça'' ilə derbidən sonra 6 oyunluq cəza aldıqdan bu yana komanda hələ də qələbəyə həsrətdi. Ümumilikdə ''Cim-Bom'' indiyədək ''İmperator''un cəzalı olduğu 35 superliqa matçının 21-də qələbəyə həsrət qalaraq (14 heç-heçə, 7 məğlubiyyət) 49 xal itirib!