Şəhriyar yubiley oyunu barədə nə düşünür? - AÇIQLAMA
Premyer-liqada 14-cü turun oyunları yekunlaşıb.
"Keşlə" səfərdə "Sumqayıt"ın qonağı olub - 3:1. Bu tur qonaq komandanın futbolçusu Şəhriyar Əliyev üçün əlamətdar olub. O, ölkə çempionatında 200-cü oyununu keçirib. Şəhriyar çempionatda 2011/12 mövsümündə “Bakı”nın heyətində debüt edib. Bu komandada 54, “Qarabağ”da 2, “Kəpəz”də 76, “Sumqayıt”da 34, “Keşlə”də 34 dəfə şans qazanıb. Bu əlamətdar rəqəmlə bağlı futbolçunun özü ilə əlaqə saxladıq.
Şəhriyar Əliyevin təəssüratları belə oldu:"Sözün açığı oyunun yubiley xarakterli olduğunu bilmirdim. Sonradan öyrəndim. Bu haqda heç fikirləşməmişəm. Düşünürəm ki, ən əsas zədəsiz futbol karyerasıdı. Artıq 200 oyun olub. Amma bu vaxta qədər xeyli zədələrim də oldu. İnşallah, bundan sonra zədəsiz futbol arzulayıram. Zaman göstərəcək bundan sonra nə qədər oyun oynaya biləcəm. Əsas məqsədim ideal formada olmaqdı. Çünki futbolçu ideal formada olarsa, oyun sayları da cox olur. Bundan sonra daha 200 oyunda oynamaq istəyərəm".
GÜNAY VƏLİYEVA
