Nurlan İbrahimovla bağlı qərar gələn il veriləcək - RƏSMİ
"Qarabağ"ın sabiq mətbuat katibi Nurlan İbrahimov Vətən müharibəsi dövründə ermənilərlə bağlı statusa görə futboldan ömürlük kənarlaşdırılmışdı.
UEFA-dan CAS-a şikayət edən Ağdam təmsilçisinin keçmiş rəsmisinin oktyabrda dindirilməsi olmuşdu. Həmin prosesdən sonra qərarın noyabrın 25-i açıqlanacağı deyilsə də, sonradan vaxt dekabrın 22-nə təxirə salındı. Amma görünən odu ki, Nurlan İbrahimovla bağlı məsələ bu il həllini tapmayacaq. Onun vəkilini rəsmi feysbuk hesabında qərarın verilmə tarixinin 27 yanvar 2022-ci ilə uzadıldığını açıqlayıb.
Məsələ ilə bağlı fikirlərini daha dəqiq bildirməsi üçün Fərid Haqverdiyevə müraciət etdik. Nurlan İbrahimovun vəkili prosesin uzadılmasını belə izah etdi:
"CAS-dan bizə rəsmi məktub gəlib. Əvvəlki açıqlamalarımda da bildirmişdim ki, qarşıdan Milad bayramı gəlir. Daha sonra yeni il tətilləri olacaq. CAS qeyri-rəsmi olaraq dekabrın 25-dən yanvarın 10-na kimi tətildə olur. Qərarın verilməsinin uzadılması müəyyən qədər gözlənilən bir şey idi. Belə görsənir ki, hakimlər hələ ki, məsələ ilə bağlı yekun qərar verməyiblər. Gözləyək, görək nə olur. Yəqin ki, yanvarın ortalarına kimi nəsə dəyişiklik olmayacaq. Görək qərarın verilmə tarixini yenə uzadacaqlar, yoxsa yanvarın 27-də yekun nəticəni açıqlayacaqlar?"
