“Palmeyras”ın təcrübəli futbolçusu Felipe Melo ilə yolları ayırdığını xəbər vermişdik.

Braziliya klubunun mətbuat xidmətinin məlumatında rəhbərliyin 38 yaşlı yarımmüdafiəçinin müddəti sona çatan müqaviləsini yeniləməyi lazım bilmədiyi qeyd edilmişdi. Felipe Melo “Palmeyras”da 2017-ci ildən çıxış edirdi. Bu klubla iki dəfə Libertadores Kubokunun qalibi olan futbolçu artıq özünə yeni iş yeri tapıb. O, bundan sonra da A seriyasında çıxış edəcək. Təcrübəli futbolçu “Fluminense”yə keçəcək. Bu haqda Braziliya klubunun prezidenti Mario Bittenkurt yerli mətbuata açıqlamasında deyib. O, Felipe Melo ilə razılığa gəldiklərini bildirib.

Səbəbkar karyerası ərzində ölkəsində “Palmeyras”dan başqa “Flamenqo”, “Kruzeyro”, “Qremio”, İspaniyada “Malyorka”, “Rasinq”, “Almeriya”, İtaliyada “Fiorentina”, “Yuventus”, “İnter”, Türkiyədə isə “Qalatasaray”da oynayıb. Onun Braziliya yığmasında 22 oyuna 2 qol vurduğunu da xatırladaq.