Türkiyə çempionatında 16-cı tura dünən keçirilən iki qarşılaşmayla yekun vuruldu.

Hər iki oyun İstanbul nəhəngləri üçün uğursuz alındı. ''Qalatasaray'' Sivas səfərində 3 xalla yanaşı Fernando Musleranı da itirdi. Oyunun 80-ci dəqiqəsində uruqvaylı qapıçı topa çıxarkən öz komanda yoldaşı Kristian Luyindama ilə toqquşdu. Bu epizodda Muslera ayağa qalxa bilmədi və hücumun davamında ''Sivasspor'' qələbə qolunu vurdu. Təcrübəli qapıçı göz yaşlarını saxlaya bilmədi və meydanı xərəkdə tərk etməli oldu. Türkiyə mətbuatının yazdığına inansaq, Muslera ən azı 4 həftəliyə sıradan çıxıb. Xatırladaq ki, 2011-dən ''Cim-Bom''un şərəfini qoruyan və klub tarixinin ən çox oyun keçirən, eləcə də ən çox titul qazanan əcnəbi futbolçusu statusunda olan Muslera 2019/20-nin ikinci dövrəsində Rizə səfərində ağır zədə almışdı. Həmin zədə üzündən o, 7 ay futboldan kənar qalmışdı.

''Fənərbaxça'' da əzəli rəqibindən geri qalmamağa çalışıb. Halbuki səfərdə ''Qaziantep''lə qarşılaşan İstanbul nəhəngi qalib gələcəyi təqdirdə lider ''Trabzonspor''la xal fərqini 9-a endirəcəkdi. Amma ''Fənər'' qapıçı Berke Özərin kobud səhvlərə yol verdiyi oyunda 2:3 hesabı ilə məğlub oldu. Meydan sahiblərinin heyətində dubl edərək matçın ulduzuna çevrilən Xose Fiqeyredo uzun müddət unudulmayacaq bir qolun müəllifi oldu. Görüşün 8-ci dəqiqəsində qapıçının irəli çıxdığını görən Fiqeyredo 43 metrədən topu tora göndərdi! Bu, cari mövsümün ən uzaq məsafədən vurulan qolu oldu.