"Marsel"in prezidenti "Qarabağ"dan danışdı
Bu gün baş tutan püşkatma mərasimindən sonra “Qarabağ”ın Konfrans Liqasının pley-off mərhələsindəki rəqibinin adına aydınlıq gəlib.
"Football-plus.az" saytının məlumatına görə, təmsilçimiz qitənin üçüncü dərəcəli kuboku uğrunda “Marsel”lə mübarizə aparacaq. “Köhlən atlar”ın baş məşqçisi Qurban Qurbanov rəqib haqda fikirlərini bildirdi. Ancaq qarşı tərəf də bunu cavabsız qoymayıb. Fransa təmsilçisinin prezidenti Pablo Lonqoriya “Qarabağ”ın ünvanına təriflər yağdırıb. “Marsel” rəhbəri bu haqda klubun rəsmi saytına açıqlama verib. Lonqoriyanın Qurban Qurbanovun komandası haqda fikirlərini təqdim edirik:“Qarabağ” son illərdə avrokuboklarda iştirak etdiyi üçün təcrübəsi olan klubdu. Bu matçlar hər zaman detallar üzrə oynanılır. Bizi maraqlı oyun gözləyir. “Qarabağ” keçmiş sovet respublikalarında tətbiq olunan qış fasiləsi ilə əlaqədar ölkə çempionatında mübarizəni fevralın 7-də bərpa edəcək. Onlar bu mövsüm Konfrans Liqasında yaxşı çıxış ediblər. “Bazel”ə 0:3 hesabıyla uduzduqları son oyunu, eyni zamanda sayılmayan qolu da gördük. Hansı ki, həmin qol bu matçda dinamikanı dəyişə bilərdi. Bakıda çətinliklər yaşayan bəzi Avropa komandalarını xatırlayıram".
Klub prezidenti Konfrans Liqasının çətin və bir o qədər maraqlı turnir olduğunu söyləyib: "Bu, həm də bizim üçün bir titul qazanmaq şansıdı. “Olimpik” olaraq oynadığımız bütün yarışlarda mümkün qədər yüksəklərə qalxmaq istəyirik.Konfrans Liqası çətin, maraqlı və açıq yarışdı”.
