"Komandalar arasında rəqabət olanda futbolçular da inkişaf edir" - Yaşar Vahabzadə
"Kəpəz" Azərbaycan Kubokunun 1/8 final mərhələsində "Sabah"a 0:3 hesabı ilə məğlub olaraq mübarizəni dayandırıb.
Matçdan sonra baş tutan mətbuat konfransında Gəncə klubunun baş məşqçisi Yaşar Vahabzadə jurnalistlərin suallarını cavablandırıb:
"Oyundan əvvəl də demişdim ki, son matçı nəzərə almasaq, "Sabah" klubu uğurlu seriyanı davam etdirir. Bizim üçün çətin olacağını bilirdik. Oyun da göstərdi ki, ilk hissədə biz müəyyən qədər istədiyimizə nail olduq. Amma 2-ci hissədə müdafiədə etdiyimiz səhvlər baha başa gəldi. Rəqib futbolçuların ustalığını qeyd etmək lazımdır. Onların səviyyəsi bizim oyunçulardan üstündü. Bu da oyunda öz əksini tapdı. Rəqibi təbrik edirəm. Biz də yolumuza davam edirik. Qarşıda çempionat oyunlarımız var. Bu matçı unudub çempionata hazırlaşmaq lazımdı".
- 1-ci divizionda olan limit bir məşqçi kimi işinizə mane olur?
- 23-24 yaşlı futbolçular limitə uyğun olsa, 1-ci divizionda mübarizə bir az da maraqlı olar. Ötən illə müqayisədə limit bir az dəyişdirildi. Hər komanda heyətə bir neçə təcrübəli futbolçu cəlb edə bildi. Ona görə də çempionat maraqlı gedir. Limit bir az da dəyişdirilsə, mənə elə gəlir ki, oyunlar bir az da baxımlı olar. Komandalar arasında rəqabət olanda futbolçular da inkişaf edir.
