Deyəsən Türkiyə futbolunda yeni ənənə formalaşır.

Çempion komandanın növbəti mövsüm baş məşqçisi ilə vidalaşmaq ənənəsi. Keçən mövsüm bunu ''İstanbul BŞ''də Okan Buruk yaşamışdısa, bu dəfə eyni şey Sərgən Yalçının başına gəldi.

''Beşiktaş''da bu gün Sərgən Yalçın dönəmi rəsmən başa çatdı! Ötən mövsüm indikindən daha zəif heyətlə və daha çətin şərtlər altında ''Qartal''ı çempion edən Sərgən bu dəfə komandanı heç cür böhrandan çıxara bilmədi. Ən son Dortmund ''Borussiya''sı önündə pərən-pərən düşən ''Beşiktaş'' CL-də qrup mərhələsini xalsız və bir sıra antirekordlarla başa vurdu. Superliqada isə 15 oyuna cəmi 21 xal toplayan və tarixinin ən pis mövsümünü keçirən İstanbul nəhəngi liderdən düz 18 xal geridədi. Oktyabrın 25-də derbidə ''Qalatasaray''ı yendikdən sonra komanda keçirdiyi 8 rəsmi oyundan 7 məğlubiyyət, 1 bərabərliklə ayrılıb!

Beləliklə, ''Beşiktaş''da Sərgən Yalçın dönəmi 679 gün davam etdi. 49 yaşlı mütəxəssis bu vəzifəyə Abdulla Avcının istefasından sonra, konkret desək 2020-nin yanvarın 29-da gəlmişdi. Onun təqdimat mərasiminə 25 min fanat təşrif buyurmuşdu. Həmin mövsümdə Yalçın komandanı 7-ci pillədə qəbul edib 3-cü pilləyə qədər yüksəltməyi bacardı. Amma o, əsas uğurlarını ötən mövsüm əldə etdi. ''Beşiktaş''ın büdcəsi ''Qalatasaray''ın 1/3-nə, ''Fənərbaxça''nın yarısına bərabər olsa da, Yalçın bu komandayla həm çempionluq, həm də ölkə kubokunu qazandı! Ümumilikdə ''Beşiktaş'' bu mütəxəssisin başçılığı altında keçirdiyi 82 rəsmi oyundan 46 qələbə, 13 bərabərlik, 23 məğlubiyyətlə ayrılmış oldu. Onu da bildirək ki, bu mövsüm superliqada 15 tur ərzində istefa verən məşqçilərin sayı 11-ə yüksəldi.