"Səbail” bu gün Ramal Hüseynovla bağlı qərar verəcək

Ölkə futbolu

310

9.12.2021, 15:00

"Səbail” bu gün Ramal Hüseynovla bağlı qərar verəcək - AÇIQLAMA

AFFA İntizam Komitəsi ötən həftə keçirilən iclasında U-16 liqasının ROFM – “Səbail” oyununun 30-cu dəqiqəsində qonaqların rəsmi şəxsi Ramal Hüseynovun hakimi təhqir etməsinə və hədə-qorxu gəlməsinə görə 15 oyun stadiona girişinə qadağa qoyub.

Amma veteran futbolçu klubla müqaviləsi olmadığını, qurumun cəzasını haqsız saydığını açıqlamışdı.

Ötən sayımızda AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdulla komitənin hakimlərin oyunun protokolundakı qeydlərinə uyğun Ramil Hüseynovu cəzalandırdığını söyləmişdi. Federasiya rəsmisi İntizam Komitəsinin Azərbaycan futbol ailəsinin üzvü olan hər kəsi cəzalandıra biləcəyini də sözlərinə əlavə etmişdi. “Səbail”in icraçı direktoru Fərəc Əliyev də qəzetimizə açıqlamasında həqiqətən də Ramal Hüseynovla müqavilə bağlamadıqlarını, amma ona uyğunlaşma dövrünü keçməsi üçün vaxt verdiklərini vurğulamışdı. Klub rəsmisi Ramal bəylə görüşdükdən sonra qərar verəcəklərini bildirmişdi. Məsələnin nə yerdə qaldığını öyrənmək üçün Fərəc Əliyevlə yenidən əlaqə saxladıq. “Səbail” rəsmisi Ramal Hüseynovla danışdıqlarını, amma yekun qərarı bu gün verəcəklərini dedi. Bunu əsas götürərərk sabiq futbolçu ilə əlaqə saxladıq. Ramal Hüseynovdan “Səbail”də qalmaq istəyib-istəmədiyini, hakimi təhqir etdiyi üçün peşman olub-olmadığını soruşduq:

“Fərəc bəylə görüşmüşük. Amma konkret heç nə bəlli deyil. Sabah (bu gün) yekun qərar veriləcək. İntizam Komitəsi neçə oyunluq istəyirsə, cəza versin. Heç bir problem yoxdu. Ümid edirəm ki, mənə cəzanı Allah verməz. Bu qərarlar futbolçu olduğum vaxtlarda da çox olub. Buna görə də üstündən keçirəm. Ramal Hüseynov haqsızlığa qarşı həmişə etiraz edib. Harda haqsızlıq varsa, bunu görürəmsə, danışıram. Bu xasiyyətimi heç kim dəyişə bilməz. İstəyir işlədiyim komandada olsun, istəyir qıraqda. Fərqi yoxdu. Heç vaxt haqsızlığa göz yummaram. Deyirsiz ki, hakimi təhqir etmək düzgündü? Uşaqların yanında nə qədər doğrudu? 15 yaşlı futbolçu uşaq sayılmır. Meydana çıxırsa, uşaq yox, kişi kimi vuruşmalıdı. Mən belə bilirəm. Özüm o yaşda olanda əsas milli komandada çıxış edirdim. Vaxtilə indiki uşaqların gördüklərindən daha betərinə şahidlik etmişəm. Mən belə şeylərlə futbolçu olmuşamsa, adımdan söz etdirmişəmsə, inanıram ki, onlar da bunu bacaracaq. Bir də ki, futbolçu qıraqdan deyilən sözə qulaq asmaz. Başını aşağı salıb, oyununu oynamalıdı”.

İLKİN SULTANLI