Gimnasika növləri üzrə ixtisaslaşan Azərbaycan hakimləri “Avropa Gimnastikasının fəxri hakimi” adına layiq görülüblər.
“Football-plus.az” saytının Azərbaycan Gimnastika Federasiyasının mətbuat didmətinə istinadən məlumatına görə, ədalət təmsilçiləri arasında bədii gimnastika, kişi idman gimnastikası və tamblinq yarışlarını idarə edənlər yer alıb. Bunlar bədii gimnastika üzrə beynəlxalq dərəcəli hakim, Beynəlxalq Gimnastika Federasiyasının (FIG) bədii gimnastika üzrə Texniki Komitəsinin üzvü Natalya Bulanova, kişi idman gimnastikası üzrə beynəlxalq dərəcəli hakim Rza Əliyev və tamblinq üzrə beynəlxalq dərəcəli hakim Adil Hüseynzadədi.
Qeyd edək ki, “Fəxri hakim” mükafatı ideyasını Avropa Gimnastikası ötən il irəli sürüb. Bu mükafat ən azı üç olimpiya dövrü ərzində Avropa Gimnastikasına aid yarışlara töhfə verən hakimlər üçün nəzərdə tutulub. “Fəxri hakim” adına layiq görülənlərə diplom və döş nişanı təqdim olunacaq.