AFFA Ramal Hüseynovun cəzalanmasını haqlı sayır - AÇIQLAMA
AFFA İntizam Komitəsi ötən həftə keçirilən iclasında U-16 liqasının ROFM – “Səbail” oyununun 30-cu dəqiqəsində qonaqların rəsmi şəxsi Ramal Hüseynovun hakimi təhqir etməsinə və hədə-qorxu gəlməsinə görə 15 oyun stadiona girişinə qadağa qoyub.
Lakin sonrada veteran futbolçu mediaya açıqlamasında “dənizçilər”lə müqaviləsinin olmadığını açıqlayıb. Bu informasiyanı klubun mətbuat xidmətinin rəhbəri Mehriban Mürsəlova da təsdiqləyib.
İndi orta sual çıxır? İntizam Komitəsi “Səbail”in üzvü olmayan Ramal Hüseynovu necə cəzalandıra bilər? Sualımızı qurumun Mətbuat və İctimaiyyətlə Əlaqələr Departamentinin rəhbəri Firuz Abdullaya ünvanladıq:
“Məsələ ilə bağlı İntizam Komitəsinin rəhbərliyi ilə danışdım. Aşağı yaş liqalarında AFFA nümayəndəsi olmur. İntizam Komitəsi qərarları hakimlərin təqdim etdiyi protokola uyğun qəbul edir. Orda da Ramal Hüseynovun adı “Səbail”in üzvü kimi qeyd olunub. Bu səbəbdən də İntizam Komitəsi həmin şəxsə 15 oyunluq stadiona giriş qadağası qoyub. İstənilən halda, Ramal Hüseynov Azərbaycan futbol ailəsinin üzvüdü. Komitə təkcə harasa aidiyyatı olan şəxsləri yox, ölkə futbolu ilə bağlı hər kəsi cəzalandıra bilər”.
Redaksiyamıza daxil olan məlumata görə, Ramal Hüseynov həqiqətən də oyun zamanı özünü “Səbail”in məşqçisi kimi aparıb. Lakin o, məşqçiyə yaraşmayan hərəkətlər edib, hakimlərin ünvanına nalayiq ifadələr səsləndirib. Belə olan halda ortaya sual çıxır? Hüseynovun həmin görüşdə nə işi var idi? “Səbail”i təmsil etmirdisə, nə üçün bu komandanın futbolçularına görə dəridən-qabıqdan çıxırdı? Sualımızı “dənizçilər”in icraçı direktoru Fərəc Əliyevə ünvanladıq:
“Əvvəlcədən deyim ki, Ramal bəyin bizimlə müqaviləsi yoxdu. Amma onunla razılıq əldə etmişik. Bir aya yaxındı “Səbail”in 15 yaşadək futbolçulardan ibarət komandasını çalışdırırdı. Sadəcə, uyğunlaşma prosesi keçməsi üçün ona vaxt vermişdik. Bu sınaq müddət deyil. Ramal Hüseynov Azərbaycan futbolunda uzun illər təmsil olunan veteran futbolçudu. Bu, sadəcə, uyğunlaşma müddət idi. Ola bilərdi ki, sonradan bizimlə çalışmaq istəməsin və ya uşaqlar ondan narazı olsun. Məhz bu səbəbdən müqavilə bağlamamışıq”.
Fərəc bəy Ramal Hüseynovun işinə davam edib-etməyəcəyi ilə bağlı sualı isə belə cavabladı:
“Açığı, hələ ki bu barədə danışmamışıq. Amma sabah (bu gün) onunla görüşüb, danışacağıq. Yekun qərar barədə sizə məlumat verəcəyik”.
İLKİN SULTANLI
