“Bazel” azərbaycanlı azarkeşlər üçün sektor ayırmayıb - AÇIQLAMA
Konfrans Liqasının qrup mərhələsinin son turunda “Qarabağ” “Bazel”in qonağı olacaq.
Pley-offa vəsiqəni rəsmiləşdirən ağdamlılar son oyuna Bazel şəhərində çıxacaq. Qrup liderliyi uğrunda savaşacaq komandaların oyunu səbirsizliklə gözlənilir. Premyer-liqada “qış çempionu” olan “Qarabağ” qış fasiləsinə rahat yollanmaq niyyətindədi.
Görəsən, komanda İsveçrəyə nə vaxt gedəcək? Oyunu izləmək üçün tribunada azarkeşlərimiz olacaq? Zədəli Kevin Medinanın vəziyyəti necədi? Bu suallara cavab tapmaq üçün klubun mətbuat xidmətinin rəhbəri Gündüz Abbaszadə ilə əlaqə saxladıq: “Bazelə sabah (bu gün) gedirik. Bakı vaxtı ilə 18.00-da çarter reysi ilə yola düşəcəyik. Kevin Medinaya istirahət verilib. Hələ ki məşqə çıxmır. Özümüzlə İsveçrəyə aparacağıq. Yekun qərar orda veriləcək. Azarkeşlərin gəlib-gəlməyəcəyi ilə bağlı heç bir məlumatım yoxdu. Sosial şəbəkələrdən eşitdiyimizə görə, bilet alıb dəstəkləmək istəyənlər var. Rəsmi olaraq isə fanatlarımız üçün sektor ayrılmayıb”.
Klub rəsmisi ilə həmsöhbət olmuşkən, mətbuat konfranslarının və açıq məşqlərin də vaxtını soruşduq:“Komandamızın mətbuat konfransı dekabrın 8-i, saat 18.40-da, açıq məşq isə 19.00-da baş tutacaq”.
Xatırladaq ki, "Bazel" - "Qarabağ" oyunu 00.00-da başlayacaq. Bu komandalar H qrupunda 11 xalla ilk iki pillədə qərarlaşıb.
GÜNAY VƏLİYEVA
