İtaliya çempionatının son turlarında əsil ''Atalanta'' fırtınası əsir.

Berqamo təmsilçisi dünən 16-cı tur çərçivəsində səfərdə ''Napoli''ni 3:2 hesabı ilə məğlub etdi. Halbuki oyunun gedişində meydan sahibləri 2:1 hesabı ilə öndə idilər. Bu geridönüşə ''Atalanta''nın türkiyəli müdafiəçisi Merih Dəmiral da töhvə verdi. 23 yaşlı futbolçu 66-cı dəqiqədə hücuma qoşularaq iti bucaq altında hücumçulara xas soyuqqanlıqla topu tora göndərdi. 5 dəqiqə sonra Froyler qələbə qolunu vurdu. ''Napoli'' bu məğlubiyyətdən sonra liderliyi əldən verərək birdən-birə 3-cü pilləyə gerilədi. 4-cü pillədə qərarlaşan ''Atalanta''nın A seriyasında ardıcıl 5-ci səfər qələbəsini qazanması diqqət çəkdi. Bu, klub tarixinin ən yaxşı seriyasının təkrarlanması deməkdi. ''Atalanta'' daha öncə bunu 2020-ci ilin yanvar-iyununda bacarmışdı. Merihə gəlincə, istedadlı müdafiəçi bu mövsüm rəsmi oyunlarda 2-ci çempionatda 1-ci qolunu vurdu. O daha öncə ÇL-də ''Mançester Yunayted''lə səfər oyununda fərqlənmişdi. Ümumilikdə Dəmiral A seriyasında 46-cı oyunda 4-cü qolunu vurdu. Buna qədər o, 1 qolu ''Yuventus''un, 2 qolu ''Sassuolo''nun heyətində vurmuşdu.