“Atalanta”da iki yeni anlaşma ilə bağlı xəbərlər yayılıb.

İtaliya klubu baş məşqçisi Can Pyer Qasperini ilə müqaviləni yeniləyib. Berqamoluların mətbuat xidmətinin məlumatına görə, 63 yaşlı mütəxəssisin yeni sözləşməsinin müddəti 2024-cü ilin yayına qədər nəzərdə tutulub. Yeni müqavilədə müddətin sonradan daha birilliyə artırıla biləcəyi də qeyd edilib. Qasperini “Atalanta”nı 2016-cı ildən çalışdırır. Onun komandası hazırda A seriyasında 15 oyuna 31 xalla 4-cü yeri tutur.

Berqamo klubu Jeremi Boqa ilə də razılığa gəlib. 24 yaşlı futbolçunun “Atalanta” ilə müddəti 2026-cı ilin yayına qədər nəzərdə tutulan müqavilə imzalaması gözlənilir. Hazırda afrikalı hücumçunun keçidi ilə bağlı “Sassuolo” və “Atalanta” arasında danışıqlar aparılır. Hazırkı klubunun Boqanı 20 milyon avroya satmağa hazır olduğu məlumdu.