Makqreqor: “Dönüşüm qaçılmazdı, ancaq...”
İyulun 12-də Las-Veqasda Dastin Porye ilə döyüşdə ayağı sınan Konor Makqreqor bərpa prosesi haqda danışıb:
“Ağağımın iç sümüyü sağalsa da, yan tərəf hələ də tam sağalmayıb. İndi həlledici amil sakitliyi qorumaqdı. UFC ilə müqaviləyə görə hələ iki döyüşüm də olmalıdı. Həyatım boyunca UFC çərçivəsində döyüşmək daha yaxşıdı. Apreldə sınaq döyüşlərinə çıxacam. Dönüşüm qaçılmazdı, ancaq indi sakitliyi qorumaq lazımdı”.
33 yaşlı irlandiyalı indiyə qədər keçirdiyi 28 döyüşün 22-də qələbə qazanıb, 6-da uduzub. Onun son döyüşdə uduzduğu amerikalı Porye də aralarındakı mümkün 4-cü döyüşə toxunub:
“İndiki məqamda bu qarşıdurma keçmişdə qalıb. Mən heç bu haqda düşünmürəm, o isə ağzına gələni danışır. Konor daha nə edəsidi ki? Qoy çərənləsin. Bütün düşüncələrim titul uğrunda döyüşə yönəlib”.
Bildiyiniz kimi, Porye ilə Makqreqor indiyə qədər oktaqonda üç dəfə üz-üzə gəlib. İrlandiyalı 2014-cü ildə nokautla qalib gəlibsə, amerikalı həm 2020-nin yanvarında, həm də bu ilin iyulunda onu məğlub edib. Porye dekabrın 11-də UFC 269 turniri çərçivəsində orta çəki dərəcəsinin çempionu – braziliyalı Çarlz Oluveyra ilə titul döyüşünə çıxacaq.
Bu arada “Portlend”in müdafiəçisi Demyen Lillard Konorla bağlı maraqlı ifadə işlədib:
“Konor Makqreqor məni UFC fanatı etsə də, hələ boksa üstünlük verirəm. Konor daha üç dəfə uduzsa da belə, onun döyüşünə baxmaq üçün pul ödəyərdim”.
Döyüş dünyasından söz düşmüşkən, UFC-nin yüngül çəkidə sabiq çempionu Həbib Nurməhəmmədov pula ehtiyacının olmadığını bildirib:
“Bir il əvvəl mənə Floyd Meyvezerlə döyüşməyi təklif etdilər. Dana Uayt onda Əliyə demişdi ki, “niyə Həbib həmin döyüşə görə nə qədər qazana biləcəyini məndən soruşmur?” Yəqin adamlar məni başa düşmür... Əlbəttə, hamı pulu sevir, pul çox vacibdi. Ancaq mənim üçün hər şey deyil. Pulla bağlı vəziyyətim qaydasındadı. Allah bütün bu pulları xərcləmək üçün mənə ömür versə, çox yaxşı olardı. Pul qazanmaq işin bir tərəfidi. İkinci tərəf isə onu necə xərcləməkdi. Karyeramı bitirmişəm və indi qarşıda duran vəzifə həmin puldan necə yararlanmaqdı. İdmanla bitirdim, artıq öz həyatım var. Oktaqondan kənardakı həyat da idmandı, ancaq fərqli idman”.
Xatırladaq ki, Həbib oktaqonda son döyüşü ötən ilin oktyabrında UFC 254 turniri çərçivəsində Castin Qetji ilə keçirib və boğucu fəndlə qalib gəlib.
