"Ülvi İsgəndərovun epizodunda penalti verməmək üçün daha nə etmək lazım idi?" - Elmar Baxşıyev
Premyer-liqanın 12-ci turunda "Qəbələ" doğma meydanda "Qarabağ"la heç-heçə edib.
"Football-plus.az" saytının məlumatına görə, oyundan sonra mətbuat konfransında çıxış edən "qırmızı-qaralar"ın baş məşqçisi Elmar Baxşıyev görüş haqda fikirlərini səsləndirib:
“Bilirdik ki, bizi ağır oyun gözləyir. “Qarabağ” çempionatımızın lideridi. Rəqib öz oyun dəst-xətti ilə seçilən komandadı. Təhlükənin haradan gələcəyini bilirdik. Şükürlər olsun ki, komanda meydanda istədiyimiz əzmkarlığı göstərə bildi. “Qarabağ”la başabaş oyun alındı. Azarkeşlər üçün maraqlı, dinamik qarşılaşma oldu. Bu tempi saxlamağa və iddiamızı hər matçda ortaya qoymağa çalışacağıq”.
Elmar Baxşıyev oyunu idarə Kamranbəy Rəhimov haqda fikirlərini səsləndirib:
“Hakimlik barədə danışmaq istəmirəm. Amma elə epizodlar olur ki, onları vurğulamaq lazımdı. Ülvi İsgəndərovun epizodunda penalti verməmək üçün daha nə etmək lazım idi? Hamıya aydın idi, bircə hakim qərar verə bilmədi. Oyunun ab-havasına nəzər yetirdikdə belə bir matça ilk dəfə hakimlik edən şəxsi göndərmələri bizə də qəribə gəldi. Amma ümumi götürəndə aşağı səviyyədə idarəçilik eləmədi, tempi saxlamağı bacardı. Sadəcə, bəzi epizodlar var ki, bizdə müəmma yaratdı. Ümumilikdə komandamın çıxışından razıyam. İnanıram ki, getdikcə daha yaxşı olacağıq”.
