Cümə axşamı Konfrans Liqasının H qrupunda “Qarabağ” “Omoniya” ilə qarşılaşdı.

Ağdam təmsilçisi Cənubi Kipr təmsilçisi ilə heç-heçə etdi - 2:2.

Görüş öncə və sonra yaşanan maraqlı anları diqqətinizə çatdırırıq:

* Görüşün başlamasına təxminən 35 dəqiqə qalmış Əmrah Çəlikəl və “Qarabağ”ın digər rəsmi şəxsləri stadionun avtomobillər üçün nəzərdə tutulan girişində dayanmışdılar. Görünür, onlar hansısa önəmli qonağın yolunu gözləyirdilər.

* Komandalar meydana çıxanda “Qarabağ Ordu” azarkeş qrupu “Sizin boş xəyallarınız bizim reallıqlarımızdı. Evimizdə görüşərik!” yazılı pankart açdı.
* 32-ci dəqiqədə Dyuriş Abbasa qarşı kobud oynadığına görə sarı vərəqə ilə cəzalandı. Oyundan sonra isə “Omoniya”nın futbolçusu Ağdam təmsilçisinin paltardəyişmə otağının qarşısında 15 dəqiqə Abbasın çıxmasını gözləyib. Milli üzvü gələndən sonra hər iki futbolçu görüşüb və üzrxahlıq jesti olaraq formalarını bir-birinə bağışlayıblar. Onlar bununla mübahisənin meydanda qaldığını nümayiş etdiriblər.

* 65-ci dəqiqədə Qurban Qurbanov Vacini Ramil Şeydayevlə əvəzləmək istədi. Hətta 4-cü hakim elektron tablonu azarkeşlərə nümayiş etdirdi. Lakin Abbas Hüseynovun yerdə qaldığını görən “Qarabağ”ın məşqçiləri əvəzetmədən imtina etdilər. Hətta meydanın kənarına kimi gələn Vaci oyundan çıxmadığını görəndə təəccübünü gizlədə bilmədi.

* Mətbuat konfransında “Omoniya”nın baş məşqçisi Henninq Berqlə yanaşı, Haralambos Haralambus da iştirak etdi. Avrokubok matçlarında nadir hallarda belə hadisə yaşanır. “Qarabağ”ın mətbuat katibi Gündüz Abbaszadədən aldığımız bilgiyə görə, qaydalarda bu qeyd olunsa da, klublardan konkret tələb olunmur.

İLKİN SULTANLI