“Neftçi”nin Müşahidə Şurası Samir Abasova niyə şans verdi? - AÇIQLAMA
Dünən “Neftçi”nin Müşahidə Şurasının iclası keçirilib.
Onlayn toplantıda komandanın son nəticələri müzakirə olunub. Baş məşqçi Samir Abasova dəstək verən şura üzvləri onun vəziyyəti qısa zamanda toparlayacağına inandıqlarını vurğulayıblar. Samir Abasov da komandanın nəticələrini düzəldəcəyinə söz verib.
Toplantı haqda daha ətraflı məlumat almaq üçün “Neftçi”nin Müşahidə Şurasının üzvü Səməd Qurbanovla əlaqə saxladıq. O, iclasda başverənləri detallı şəkildə açıqladı: “Başda Çingiz Abdullayev olmaqla, Kamran Quliyev və digər üzvlər iclasda iştirak etdi. Hamımız komandanın nəticələrindən narazıyıq. Bütün şikayətlərimizi Samir Abasova bildirdik. Komandanı toparlamağın vacibliyi nəzərinə çatdırıldı. Buna rəğmən, onunla yola davam etməyə qərar verdik. Belə vəziyyətdə baş məşqçini göndərmək bir az düzgün deyil. O, sona qədər getməlidi. Samirə dedik ki, sən baş məşqçisən, toparla uşaqları, "Neftçi"nin adını özünə qaytar. "Neftçi" həminki "Neftçi" deyil, futbolçular ruhdan düşüblər. Abasova göstərişlər verildi ki, uşaqlarla söhbətləş, məsləhətləş. Mənə elə gəlir, bu məqamda baş məşqçini dəyişmək doğru olmazdı. Qarşıda 2 ev oyunu var - "Səbail" və "Sumqayıt" ilə. Həmin qarşılaşmalarda mütləq qələbə qazanılmalıdı. Başsız komanda necə olacaq? Ürək-dirək verdik ki, qış fasiləsinə qədər hələ 3, daha sonra da oyunlar var. Bundan əlavə, kubokun matçları da qarşıdadı. Belə məqamda baş məşqçini "sındırmaq" olmaz. Samirə bildirdik ki, “Neftçi” bu duruma düşməməlidi. Komanda uduzanda, əlbəttə, azarkeşlər etiraz edəcək. "Neftçi" xalqın, azarkşelərin komandasıdı. Komanda adı, xalq, azarkeşlər üçün oynamalıdı ki, onlar da dəstək olsunlar. Ardıcıl 3 turdu uduzurlar, azarkeşlər də yaxşı oyun, qələbə tələb edir. Qışın soyuğunda, yayın istisində stadiona gəlir, daim komandanın yanında olurlar. Onlar həmişə istəyirlər ki, "Neftçi" zirvədə olsun. Azarkeşləri də başa düşmək lazımdı. Yəqin bir-iki oyundan sonra hər şey qaydasına düşəcək. Müşahidə Şurasında hamı buna inanır və Samirə dəstək olduğunu bildirdi”.
İLKİN SULTANLI
