“Mançester Yunayted”in Ole Qunnar Sulşeri istefaya göndərməsi daha iki mütəxəssis ilə bağlı xəbərləri aktuallaşdırıb.
Bilindiyi kimi, premyer-liqada uğursuz nəticələrin sıralanması norveçli mütəxəssislə qarşılıqlı razılıq əsasında yolların ayrılmasına səbəb olub. Artıq qüvvədən düşən müqavilənin şərtinə əsasən, komandaya 2018-ci ildə təyinat alan 48 yaşlı Sulşerə 7,5 milyon funt sterlinq təzminat ödənilməlidi. Qeyd edək ki, anlaşmanın müddəti 2024-cü ilin yayına qədər nəzərdə tutulsa da, sənəddəki bəndlərdən birində məşqçiyə nə vaxt qovulmasından asılı olmayaraq, yalnız bir mövsümün məvacibi qədər kompensasiya çatacağı qeyd edilmişdi.
MY-yə vaxtilə futbolçu kimi 11 il (1996-2007) xidmət etmiş Sulşer klubun mətbuat xidmətinə belə açıqlama verib:
Norveçlinin artıq keçmiş köməkçisi Maykl Karrik Sulşerin əvəzləyicisi tapılanadək komandaya müvəqqəti rəhbərlik edəcək. Baş məşqçinin səlahiyyətlərini qəbul edən sabiq yarımmüdafiəçi bu funksiyanı nə qədər lazımdısa yerinə yetirməyə hazır olduğunu bildirib. Ancaq rəhbərlik komandaya daimi əsasda başçılıq edəcək çalışdırıcını tezliklə “Old Trafford”a gətirməkdə qərarlıdı. Artıq Zinəddin Zidan mankunianların təklifini növbəti dəfə geri çevirib. Bir sıra mənbələr fransalı mütəxəssisin, ümumiyyətlə, İngiltərədə işləmək istəmədiyini iddia edir. Onun təklifdən iki səbəbdən imtina etdiyi xəbər verilir: əvvəla Zidan ingilis dilində sərbəst danışa bilmir, ikinci səbəb isə onun həyat yoldaşının Fransanı tərk etmək istəməməsi ilə bağlıdı. Zidanın yaxın gələcəkdə PSJ-nin və ya Fransa yığmasının başına keçmək niyyətində olduğu da bildirilir.
Son xəbərlərə inansaq, onun tezliklə Paris klubuna təyinat alacağı istisna olunmur. Belə ki, Maurisio Poçettinonun PSJ ilə müqaviləsini pozmaq və İngiltərəyə qayıtmaq niyyətində olduğu bildirilir. 49 yaşlı argentinalının agenti artıq MY ilə danışıqlara başlayıb. Qeyd edək ki, yaxın keçmişdə 5 il (2014-19) “Tottenhem”i çalışdıran Poçettinonun ailəsi hələ də Londonda yaşayır. O isə MY variantından yenidən ailəsinə yaxın olmaq fürsəti kimi də yararlanmaq istəyir. Bir sözlə, Zidanın PSJ-yə mümkün təyinatını da nəzərə alsaq, maraqlı yerdəyişmələr gözlənilir.
