Bu mövsüm həm Türkiyə çempionatında, həm də Çempionlar Liqasında işləri yaxşı getməyən ''Beşiktaş'' Türkiyə Futbol Federasiyasına müraciət edib.

Son 13 rəsmi oyunun 9-da məğlub olan İstanbul nəhəngi şənbə günü noyabrın 27-də 14-cü tur çərçivəsində öz meydanında debütant ''Girəsunspor''la qarşılaşacaq. Rəhbərlik federasiyadan həmin matçın 1 gün sonraya, yəni noyabrın 28-nə keçirilməsini tələb edib. Bilindiyi kimi ''Beşiktaş'' sabah Çempionlar Liqasının qrup mərhələsinin 5-ci turunda ''Ayaks''ı qəbul edəcək. Türkiyənin son çempionunu narazı salan məqam odu ki, komanda ''Ayaks''la oyundan 3 gün sonra növbəti matçına çıxmalı olacaq. Amma məsələn, ''Fənərbaxça'' 4 gün sonra oyuna çıxacaq. ''Fənər'' cümə axşamı AL matçı keçirdikdən sonra superliqa oyununa bazar ertəsi çıxacaq. Əslində ''Qalatasaray'' da ''Beşiktaş''la eyni vəziyyətdədi. ''Cim-Bom'' cümə axşamı AL oyununu keçirdikdən 3 gün sonra, yəni bazar günü superliqada növbəti oyununu keçirməli olacaq. ''Beşiktaş''ın əlində tutduğu əsas ''bayraq'' odu ki, ''Ayaks'' da erediviziyada növbəti matçını bazar günü keçirəcək. Türkiyə mətbuatının yazdığına inansaq, ''Beşiktaş''ın rəqibi ''Girəsunspor''un təqvimin dəyişməsinə və oyunun bir gün sonraya keçirilməsinə heç bir etirazı yoxdu.

Bu, son bir ayda ''Beşiktaş''ın federasiyaya ikinci bənzər müraciətidi. Ayın əvvəlində də buna bənzər vəziyyət yaranmışdı. Komanda noyabrın 3-də ÇL-də ''Sportinq''lə qarşılaşdıqdan 3 gün sonra, yəni noyabrın 6-da superliqada ''Trabzonspor''la üz-üzə gəlməli idi. ''Beşiktaş'' həmin matçın 1 gün sonraya keçirilməsini tələb etsə də, federasiya onların tələbini geri çevirmişdi!