Dünən superliqanın 13-cü turu çərçivəsində bu turnirin şah oyunu keçirildi.

''Qalatasaray'' öz meydanında 52 min azarkeşin önündə əzəli və ən prinsipial rəqibi ''Fənərbaxça''ya 1:2 hesabı ilə məğlub oldu. ''Fənər'' hesabda geri düşməsinə və derbinin son anlarını azlıqda keçirməsinə baxmayaraq əzmkar qələbə qazandı.

Bununla da ''sarı-lacivərdlilər''in əzəli rəqibə qarşı səfərdəki məğlubiyyətsiz seriyası 7 oyuna çatdı (2 qələbə, 5 heç-heçə)! ''Qalatasaray'' ''Fənər''i öz meydanında sonuncu dəfə 2014-ün oktyabrında yenib. Qeyd edək ki, ''Cim-Bom''un superliqa tarixində ən çox uduzduğu (51) və ən çox top buraxdığı (160) rəqib məhz ''Fənərbaxça''dı. Vitor Pereyra son 19 ildə superliqada Fatih Terimə qarşı ilk səfər qələbəsi qazanan əcnəbi mütəxəssis oldu. Sonuncu dəfə bunu 2002-ci ildə ''Beşiktaş''ın başında Mirça Luçesku bacarmışdı. Onu da bildirək ki, ''Qalatasaray'' bu mövsüm 13-cü çempionat oyununda 4-cü dəfə məğlub oldu. Bu, Fatih Terimin klubda çalışdığı dönəm ərzində antirekorddu.

Son dönəmlərdə böyük marağa və populyarlığa səbəb olan ''Squid game'' serialı derbiyə də damğa vurdu. Oyundan öncə ''Qalatasaray'' fanatları tribunada məhz bu Koreya serialının əsasında şou hazırlayaraq ''1907 mübarizəni dayandırdı'' sözləri yazılmış möhtəşəm bir performans göstərdilər. Amma oyundan sonra cavab vermək növbəsi ''Fənərbaxça''ya çatdı. Komanda sosial şəbəkələrdəki bütün rəsmi səhifələrində bu atmacaya cavab olaraq ''1905 nömrəli oyunçu mübarizəni dayandırdı. Oyun bitti'' paylaşımını etdi.