Daniel Alveşin “Barselona”da alacağı məvacibin məbləği açıqlanıb.

O, bir neçə həftə əvvəl bu komandada yenidən oynamaq naminə rəhbərliyin istənilən təklifini qəbul etməyə hazır olduğunu bildirmişdi. Məşhur braziliyalı futbolçu ilə 155 min avro qazanacaq. Bu, La Liqanın yüksək divizionda oynayan klublara futbolçusuna ödəməyə icazə verdiyi minimal əmək haqqıdı. Alveş bu planda “Barselona”da hamıdan geridədi. Xatırladaq ki, İspaniya klubu onunla müddəti mövsümün sonuna qədər razılaşdırılan müqavilə bağlayıb.

“RAC1” radiostansiyasının xəbərinə görə, 38 yaşlı müdafiəçinin müqaviləsində onun təzminat qiyməti 100 milyon avro müəyyən edilib. Beləliklə, braziliyalı oyunçunu almaq istəyən klub “Barselona”ya bu məbləği ödəməli olacaq. Sabiq komandasına azad agent kimi qayıdan Danielin müqaviləsini daha birilliyə yeniləmək imkanı da olacaq. O, göy-qırmızı formada rəsmi matçlarda 2022-ci ilin yanvarından iştirak edə biləcək.