AFFA erməni təxribatıyla bağlı FİFA və UEFA-ya müraciət edəcək - AÇIQLAMA
DÇ-2022-nin seçmə mərhələsində Ermənistan doğma meydanda Almaniya ilə qarşılaşıb.
Görüş ev sahiblərinin 1:4 hesablı məğlubiyyəti ilə yekunlaşıb. Təbii ki, bizi maraqlandıran oyunun nəticəsi deyil. Ermənilər yenə öz xislətindən əl çəkməyərək təxribata əl atıblar. Belə ki, tribunalarda qondarma qurumun əski parçası dalğalanırdı. Dəfələrlə eyni hal yaşansa da, bunun qarşısını almaq, deyəsən, mümkün deyil.
Görəsən, AFFA bununla bağlı hansı addımı atacaq? Bu sualla qurumun Mətbuat və İctimaiyyətlə Əlaqələr Departamentinin rəhbəri Firuz Abdullaya müraciət etdik: “İrəvanda keçirilən qarşılaşma zamanı ermənilərin törətdikləri təxribatla bağlı FİFA və UEFA-ya müraciət olunacaq. İndiyə qədər də həmişə müraciət etmişik. Hansısa tədbirin görülüb-görülməməsi ilə bağlı isə mənim nəsə deməyim düz olmaz. Çünki bu, UEFA və FİFA-nın səlahiyyətinda olan məsələdi. Onsuz da hər addımda erməni həyasızlığının şahidi oluruq. Bu baxımdan onların həmişə qondarma respublikanın əski parçasını tribunaya çıxarması böyük ölçüdə təəccüblü deyil”.
GÜNAY VƏLİYEVA
