''Brayton''un baş məşqçisi gecəni çöldə niyə keçirtdi?
Premyer-liqa təmsilçisi ''Brayton''un məşqçilər korpusu bu günlərdə qeyri-adi bir aksiyada iştirak edib.
Baş məşqçi Qrem Potter, eləcə də onun köməkçiləri Billi Rid ilə Bruno Saltor isti geyinərək bir gecəni küçədə keçiriblər. Bununla da onlar evsiz insanlara dəstək olan ''The Big Sleep Out'' kampaniyasında iştirak ediblər. Məqsəd bu problemə diqqət yetirmək və bu sahə üçün mümkün qədər çox pul toplamaqdı. 46 yaşlı Potter aksiyada iştirak etdikdən sonra jurnalistlərə bunları deyib: ''Gözlərim yumulu olsa da, buna ''yatmaq'' demək olmazdı. Bu insanların hər gecə nə çəkdiyini təsəvvür etmək belə çətindi. Üstəlik pis yatmaqla yanaşı, bu insanlar növbəti gün onları nə gözlədiyini, bir də nə vaxt yemək yeyəcəklərini də bilmirlər. İnsanlar bu məsələni qulaqardına vurmağa çalışsa da, evsizlər bizim ictimaiyyətin bəlkə də ən çox köməyə ehtiyacı olan təbəqəsidi. Onlara mütləq yardım etməliyik''.
Qeyd edək ki, ''The Big Sleep Out'' aksiyası Brayton şəhərində hər il keçirilir. Yığılan məbləğ sayəsində o bölgənin evsiz insanlarına ilkin yardım göstərilir, yəni onlara qida, geyim və yatmaq üçün ləvazimatlar alınır. Eləcə də psixoloji yardım göstərilir. Onu da bildirək ki, sosiologiya sahəsində bakalavr, emosional intellekt sahəsində isə magistr təhsili olan Potter 2019-dan ''Brayton''u çalışdırır.
