“ASK Arena”nın taleyindən narahat olmağa dəyməz

2022-ci ildən “Keşlə”nin adının dəyişdirilib “Şamaxı” olacağından xəbəriniz var. Hazırda Bakıda yerləşən klub köçdən sonra təmsil edəcəyi rayonun adını daşıyacaq. AFFA-nın bu ideyasından razı qalanlar da var, narazılar da. Bəs görəsən, “Keşlə”nin adını dəyişməsi, bölgəyə köçməsi kluba nə verəcək, bunun hansı müsbət və mənfi tərəfləri var? Bu yazıda həmin məqamları aydınlaşdırmağa çalışacağıq.

Bölgəyə köçmək kluba nə verəcək?
Tez-tez adını dəyişmək sanki “Keşlə”nin alın yazısıdı. Bir qədər tarixə qayıdaq. 1997-ci ildə yaranan və “Xəzər Universiteti” kimi ölkənin futbol elitasına daxil olan klub 2004-dən “İnter” adı altında fəaliyyətini davam etdirdi. Beynəlxalq Bankın o vaxtkı rəhbəri, sonradan milyardları mənimsəməkdə suçlanan və dustaq həyatı yaşayan Cahangir Hacıyev “tələbələr” ləqəbi altında milli çempionatda mübarizə aparan klubu satın almaqla adını dəyişdi, ona yeni nəfəs verdi. Cahangir bəyin prezidentliyi dönəmində ölkənin ən iddialı klublarından birinə çevrilən “İnter”in ləqəbi də dəyişdi: “bankirlər”. “Bankirlər” geniş büdcənin hesabına heyətinə sanballı legionerlər dəvət etdi, komandanın “sükan”ı ən azı MDB məkanında tanınan mütəxəssislərə tapşırıldı. 2007/08 mövsümünü çempion kimi başa vurmağı bacaran “bankirlər” bir də 2009/10 “futbol ili”ndə qızıl medalları boynundan asmağı bacardı. Ancaq rəhbərlik səviyyəsində dəyişiklik 2017-cı ildə komandanın adının dəyişdirilməsi ilə nəticələndi. Klubun prezidenti Zaur Axundov, adı isə “Keşlə” oldu. Ad dəyişikliyi səbəbindəm komandanın ev oyunlarını keçirdiyi stadionun da adı dəyişdirilərdi: “Şəfa” “ASK Arena”ya çevrildi. Komandanın daxili və beynəlxalq arenada uğurlarına baxmayaraq, “İnter”, sonra isə “Keşlə” adı azarkeş toplamaq üçün yetərli olmadı. “İnter”, 13 ildən sonra “Keşlə” adlanan klub azarkeşlərə sanki “ögey övlad” təsiri bağışladı. Ən yaxşı halda “Keşlə” (son adı belədi) tribunalara yüzlərlə tamaşaçı toplamağı bacardı. Çünki paytaxtın azarkeşlər tərəfindən qəbul olunan bir klubu var – “Neftçi”!

Şamaxıya köçmək nə vəd edir?
Artıq neçə illərdi futbol camiəsi ölkə futbolunun arealının genişlənməsini istəyir. İctimaiyyət “Bakı birinciliyi” adını verdiyi premyer-liqada bölgə təmsilçilərinin olmasını arzulayır. Bugünlərdə Prezident İlham Əliyev Şamaxı şəhərində yeni stadionunun açılışını etdi. Arena müasir standartlara cavab verir. Həmin vaxt bir çoxları “stadion var, ancaq komanda yoxdu” fikrini səsləndirib, bu idman qurğusunun boş qalacağından təəssüfləndiyini dilə gətirdi. Ancaq çox keçmədən AFFA rəhbərliyi “Keşlə”nin Şamaxıya köçməsini və bu rayonun adını daşımasını təklif etdi. Bir müddət əvvəl “Bakı birinciliyi”ndən dad-aman edənlər bu dəfə nədənsə assosiasiyanın ideyasına ağız büzməyə başladılar. Niyə cənablar? Burda nə pis iş var? Məgər paytaxtda fəaliyyət göstərən klubların bölgələrə göndərilməsini istəyənlər biz deyildik? İndi nə oldu? Bu addım indi “Keşlə”, 2022-ci ildən “Şamaxı “adı altında premyer-liqada çıxış edəcək komandaya nə ziyan vuracaq? Bu addımın ölkə futboluna ancaq xeyri dəyəcək, nəinki ziyanı. Müstəqilliyimizin ilk illərində milli çempionatda öz komandası ilə təmsil olunan bölgəyə, Azərbaycan tarixində xüsusi yeri olan, 9 əsr müstəqilliyini qoruyan, Teymurləng kimi dünyanı lərzəyə gətirən sərkərdəyə baş əyməyən Şirvanşahlar dövlətinin paytaxtı olan Şamaxıya böyük futbol qayıdır. Bunun nəyi pisdi, burda nə qəbahət var? Klub bu gün tam olaraq AFFA-dan, dolayısı ilə SOCAR-dan maliyyəşirsə, Şamaxıya köçəndən sonra böyük ehtimalla özünə yeni sponsorlar da tapacaq, iddiasını daha da artıracaq. Odu ki, vaxtilə “tələbələr”, sonra “bankirlər”, son üç ildə isə “ağ-qırmızılar” ləqəbi ilə tanınan klub, tarixi kökləri nəzərə alsaq, Şirvanşahlar dövlətinin rəmzi kimi “şirlər” ləqəbi ilə səhnəyə çıxacaq. Və ən əsası, böyük futbol üçün darıxan şamaxılılar ev oyunlarında komandanı tək buraxmayaraq tribunaları dolduracaqlar. Bunu ən azı iki il öncə Region Liqasında mübarizə aparan həvəskarlardan ibarət “Şamaxı”nın timsalında görmüşük. Prezidentin sərəncamı ilə 2018-ci ildə rayona icra başçısı təyin olunan Tahir Məmmədov da futbol azarkeşi kimi tanınır. Heç şübhəsiz, o da daxili imkanlar hesabına “Şamaxı”ya dəstək olmağa çalışacaq.

Aşağı yaş qruplarının taleyi necə olacaq?

AFFA-nın yaydığı xəbərdən də göründüyü kimi, klubun Şamaxıya köçməsi bir-iki günün işi deyil. Əsas komanda bəlkə də Şimali Qafqaz dağlarının ətəyinə tez köçsə də, klubun aşağı yaş qruplarına gələn ilin sonuna kimi vaxt verilib. Bəli, bəlkə də bölgədə aşağı yaş qruplarına paytaxtdakı kimi çox uşaq cəlb etmək mümkün olmayacaq, istedad baxımından kasadlıq yaşanacaq. Ancaq onu da nəzərə almaq lazımdı ki, uzun illərdi Şamaxıda klub yoxdu, yerli istedadlar bu səbəbdən itib-batır. Aşağı yaş qruplarına rəhbərlik edəcək əlaqələndirici indidən bu yöndə işə başlamalı, hazırda klubla müqavilə müddəti davam edən istedadlı uçaq və yeniyetmələri böyük köçə hazırlamalıdı. Onların valideynləri ilə söhbət etməli, gələcəyi üçün heç bir narahatlığa əsas olmadığını isbatlamalıdı. Təbii ki, aşağı yaş qruplarına rəhbərlik edən mütəxəssisin bölgədə işləmək fikri varsa. Yoxdusa, bəribaşdan rəhbərliyi xəbərdar etməlidi ki, bir ildən sonra bu yöndə hansısa problem yaşanmasın. Heç şübhəsiz, klub rəhbərliyi aşağı yaş qruplarını nəzərə alıb onlar üçün də şərait yaradacaq. Uşaq və yeniyetmələrin qalmaq yeri təmin olunmalı, təhsillə bağlı suallar həllini tapmalıdı. Əks halda klubun Bakıda fəaliyyət göstərdiyi dönəmdə yetişdirdiyi və gələcəyinə sərmayə qoyub ümid bəslədiyi heç bir gəncin valideyini övladının bölgəyə getməsinə razı olmayacaq. Yəqin ki, bu nüanslar nəzərə alınacaq.

“ASK Arena”ya görə narahat olmağa dəyməz
“Keşlə”nin Şamaxıya köçməsi xəbəri ortaya çıxandan sonra çoxlarını bir sual maraqlandırır. Görəsən, komandanın bu gün ev oyunlarını keçirdiyi, Heydər Əliyev prospektində yerləşən “ASK Arena”nın taleyi necə olacaq? Bu gün üçün bu məsələ ilə bağlı hansısa məlumat olmasa da, müasir standartlara cavab verən, ərazisində baza, yardımçı meydanlar olan stadiondan narahat olmağa dəyməz. Ölkə futbolunun inkişafına cavabdehlik daşıyan AFFA yəqin FİFA-nın maliyyə yardımı hesabına qurulan arenanın tarixin yaddaşına köçməsinə imkan verməz. Paytaxtın ən önəmli prospektində yerləşən idman qurğusu böyük ehtimalla növbəti mövsümdə müvəqqəti də olsa, işğaldan azad olunan hansısa bölgənin təmsilçisinin sərəncamına veriləcək. Bundan başqa, cari mövsümdə o da ola bilər ki, assosiasiya bayrağı altında keçirilən müxtəlif yaş qrupu üzrə liqaların oyunlarını da sözügedən stadiona köçürsün. Onsuz da hazırda yarışlara evsahibliyi edən Hövsan Olimpiya Kompleksinin meydanı istər məşqçilərin, istərsə də valideynlərin ürəyincə deyil.

RƏŞAD, Futbol+ qəzeti üçün