DÇ-2022-nin seçmə mərhələsində Azərbaycan doğma meydanda Lüksemburqa məğlub olub - 1:3.
Football-plus.az saytının məlumatına görə, qarşılamadan sonra mətbuat konfransında millimizin çalışdırıcısı Canni De Byazi mətbuat konfransında iştirak edib.
İtaliyalı mütəxəssis birbaşa sualları cavablandırıb...
Jurnalist olsaydınız, bu biabırçılıqdan sonra özünüzə hansı sualı verərdiniz?
- Əla sualdı. Özümə sual verərdim ki, 70 dəqiqə 10 nəfərlə oynamısınız, özünü necə hiss edirsən? Cavab o olardı ki, çox pis hiss edirəm. Üçüncü qola kimi meydanda bərabər şəkildə mübarizə apardıq. 1:2 hesabından sonra oyuna qayıtdıq, Emin Mahmudov və Rüstəm Əhmədzadənin ifasında iki yaxşı qol imkanımız oldu. Düşünürəm ki, bundan artığını edə bilməzdik. Özümə bir sual da vermək istərdim. Soruşardım ki, Konfrans Liqasında qol vuran Toral Bayramov və Abbas Hüseynov yoxdu, özünü necə hiss edirsən? Onlar komandanın gələcəyi olan iki aparıcı oyunçudu. Uğur üçün vaxt tələb olunur. Böyük uğura nail olmaq üçün proqramlı şəkildə işləmək lazımdı. Özümə bir sual da verə bilərəm. Amma sizin işinizi əlinizdən ala bilərəm.
- Düşünmürsünüz ki, Azərbaycan millisində edə biləcəyinizin maksimumunu etdiniz?
- Mənim rəhbərliyim altında 19 oyun keçirmişik. Düşünmürəm ki, bu azdı və ya çoxdu. Qrupda bizdən güclülər çox idi. Hətta bu gün qarşılaşdığımız Lüksemburq da bizdən güclüdü. İrlandiya ilə oyunda qələbəni son anda əldən vermişdik. Millini çalışdırmaq uzun və çətin işdi. Əminəm ki, 100 yox, 101 faiz gücümü ortaya qoydum. Ola bilər biliyim azdı, bilmirəm. Komandanın inkişafı üçün əlimdən gələn hər şeyi etdim. Uşaqlara həmişə deyirəm ki, qələbə ilə məğlubiyyət arasında fərq çox azdı. Xırda detallar hər şeyi həll edir. Uzun müddət bir yerdə işləməyə çox imkanımız da olmur.
- Hər oyundan sonra deyirsiniz ki, inkişaf üçün vaxt lazımdı. Heç olmasa üç fakt sadalaya bilərsiniz ki, inkişaf var, uğur üçün vaxt lazımdı?
- Biri var oyuna azarkeş, jurnalist kimi baxmaq, biri də var məşqçi kimi. Bunlar fərqli şeylərdi. Bu gün fərqli baxıb, oyunu təhlil etdikdən sonra görə bilərsiniz ki, komandada inkişaf var. Son oyunlarda öz meydanımızda 3 qol buraxıdıq. Bu, heç də xoş hal deyil. Amma real yanaşanda inkişaf görünür. Özümüz müdafiədə hədiyyə etdik. Bunlar da nəticəyə təsir edir.
- Müqavilə müddətiniz başa çatmaq üzrədi. Gələcəyinizlə bağlı nə düşünürsünüz?
- Belə bir matçdan sonra bu barədə danışmağın mənası yoxdur. Noyabrın 30-na kimi müqaviləm var. Menecerimlə söhbət olacaq, axırda AFFA rəhbərliyi qərarını verəcək.
- Millətlər Liqasında Lüksemburqla görüşdə Mahir Emreli, bu gün isə Tellur Mütəllimov qırmızı vərəqə aldı. Bu, təsadüfdü?
- Telluru görməmişəm, onunla bağlı bu barədə danışmamışam. Hakimdən razı qalmadım, bizə absurd sarı vərəqələr verdi. Tellurun epizodunda qırmızı vərəqə var idi. Amma rəqibin kobudluqları zamanı sarı vərəqə vermirdi. Taktiki baxımdan yaxşı oyun keçirdiyimizi fikirləşirəm. Mənə maraqlıdır, 11-11-ə qalsaydıq, nəticə necə olardı? Çünki oyunçular çox yaxşı motivasiya olunmuşdular. Ölkədəki bayram ab-havasını davam etdirmək istəyirdik. Amma 10 nəfərlə qaldıqdan sonra oynamaq çətin idi.