Premyer-liqanın “Zəfər turu” adlandırılan 10-cu həftəsi məhsuldarlıqla yadda qaldı.
Qapılara 17 qol vuruldu ki, bu da ortalama məhsuldarlığın 4,25 bərabər olması deməkdi. Maraqlıdı ki, ötən mövsümün 10-cu turunda da qapılara 17 qol vurulmuşdu.
Turun ilk oyunu Masazırda baş tutdu. “Zirə”ni qonaq edən “Sabah”ı meydana yeni baş məşqçi Murad Musayev çıxarmışdı. Meydan sahibləri artıq 2-ci dəqiqədə hesabda önə çıxsalar da, qonaqlar cəmi 3 dəqiqə sonra tarazlığı bərpa etməyi bacardı. Ancaq “tələbələr” son 2 qarşılaşmada göstərdikləri məhsuldarlığı “qartallar”la görüşdə də ortaya qoydu. Hissənin tamamına qədər meydan sahibləri qonaqları daha iki dəfə mərkəzə dəvət etdi. İkinci yarının əvvəlində Xuan Kamaranın meydandan qovulması isə Rəşad Sadıqovun komandasının işinə yaradı. Qəsəbə təmsilçisi qalan dəqiqələrdə Səlahət Ağayevi daha iki dəfə məyus edib, səfərdən 1 xalla dönməyi bacardı.
Ötən tur “Qarabağ”a yenilməklə liderliyi “köhlən atlar”a təhvil verən “Neftçi” bu dəfə “Keşlə”yə məğlub oldu. Halbuki oyunun əvvəli “ağ-qaralar”ın istədiyi məcrada keçmişdi. Cəzalı olduğuna görə görüşü tribunadan izləyən Samir Abasovun komandası 35-ci dəqiqədə artıq rəqib qapısından 2 top keçirmişdi. Ancaq meydan sahibləri ruhdan düşmədi. Hissənin sonunda buraxılan qollardan birinin əvəzini çıxan “qırmızı-ağlar” fasilədən sonra qonaqları şoka salaraq daha 2 dəfə fərqlənməklə mükəmməl geridönüş etdi.
“Səbail” də hesabat turunu məğlubiyyətlə başa vuranlar arasında oldu. “Dənizçilər” bu dəfə evdə “Qəbələ”yə uduzmaqla mövsümdə 7-ci dəfə meydanı məyus tərk etdi. Yenilginin əsas səbəbkarı, heç şübhəsiz, Qoxadı. Albaniyalı müdafiəçi 56-cı dəqiqədə meydandan qovulmaqla komandasını azlıqda qoydu. Bundan yararlanan Elmar Baxşıyevin komandası isə son dəqiqələrdə vurduğu 2 qolla hesabına növbəti 3 xalı yazdı. “Neftçi”nin məğlubiyyəti fonunda bu qələbə bölgə təmsilçisinə turnir cədvəlində ikinci pilləyə yüksəlməyə şərait yaratdı.
Turun son görüşü Sumqayıtda baş tutdu. Həftəiçi Konfrans Liqasında səfərdə “Kayrat”ı məğlub edərək qrupdan çıxmağı təmin edən “Qarabağ” meydana ciddi itkilərlə çıxan “kimyaçılar”ı da məyus etdi. Qurban Qurbanovun komandası hər hissədə iki qol vurmaqla böyükhesablı qələbəni rəsmiləşdirdi. Bununla da ən yaxın izləyicisi “Qəbələ”ni 5 xal qabaqlayan ağdamlılar əzəli rəqibi “Neftçi”dən 6 xal aralandı.
Azərbaycan premyer-liqası
2-ci dövrə, 10-cu tur
6 noyabr
Sabah – Zirə 3:3
Keşlə - Neftçi 3:2
7 noyabr
Səbail – Qəbələ 0:2
Sumqayıt – Qarabağ 0:4
1. Qarabağ 10 7 2 1 22-7 23
2. Qəbələ 10 5 3 2 18-11 18
3. Neftçi 10 5 2 3 18-16 17
4. Zirə 10 4 4 2 15-11 16
5. Sumqayıt 10 3 2 5 7-12 11
6. Keşlə 10 3 1 6 11-18 10
7. Səbail 10 3 0 7 8-20 9
8. Sabah 10 2 2 6 12-16 8
Bombardirlər: Davit Volkov (Zirə) – 8, Filip Ozobiç (Qarabağ) – 6.
Növbəti turun oyunları: 19 noyabr – Qarabağ – Keşlə; 20 noyabr - Neftçi – Sabah, Zirə - Səbail; 21 noyabr – Qəbələ - Sumqayıt.
RƏŞAD
