“Aston Villa” rəhbərliyi Din Smiti vəzifəsindən azad edəndən sonra baş məşqçi problemini həll edib.
Komandanın premyer-liqada keçirdiyi son 5 oyunda xal qazana bilməməsi və 20 iştirakçı arasında 16-cı yerə düşməsi 50 yaşlı mütəxəssisin istefasını qaçılmaz etmişdi. Birmingemliləri 2018-ci ilin oktyabrından çalışdıran Smit komandanı ilk mövsümdəcə premyer-liqaya yüksəltmişdi. Onun “Aston Villa”nı İngiltərə Liqa Kubokunun finalına çıxardığını da xatırladaq.
Yerli mənbələr hələ çərşənbə günü Smiti Stiven Cerrardın əvəzləyəcəyini xəbər vermişdi. 41 yaşlı mütəxəssis “Aston Villa” ilə anlaşdığı üçün İngiltərə klubunun ona görə “Reyncers”ə nə qədər təzminat ödəyəcəyi sual doğururdu. Tərəflər artıq bu məsələdə razılığa gəliblər. Birmingemlilər gənc mütəxəssisin “Reyncers”lə müddəti 2024-cü ilə qədər olan müqaviləsinin pozulmasına görə Qlazqo klubuna təxminən 4 milyon avro kompensasiya ödəyəcəklər. “Aston Villa” ilə 2,5 illik müqaviləyə razılıq verən Cerrardın yeni iş yerində alacağı maaşa rəsmən aydınlıq gətirilməyib. Yerli mənbələr onun bu klubun tarixinə ən ödənişli məşqçi kimi düşəcəyini iddia edir.
Artıq cümə günündən birmingemliləri çalışdırmağa başlayacaq Cerrard qlazqoluları 2018-ci ilin iyunundan çalışdırırdı. Komanda ötən mövsüm sabiq yarımmüdafiəçinin başçılığı altında Şotlandiya çempionu olmuşdu.