"Sabah böyük bayramdır. Şəhidlərimizə Allah rəhmət eləsin. Onların və Müzəffər Ordumuzun sayəsində bu qələbəni əldə etmişik. "Qarabağ"ı isə bugünkü qələbə və UEFA Konfrans Liqasında mərhələ adlamaları münasibətilə təbrik edirəm. Azarkeşlərimizə də təşəkkürümü bildirirəm".
“Football-plus.az” xəbər verir ki, bunu "Sumqayıt"ın baş məşqçisi Ayxan Abbasov doğma meydanda "Qarabağ"a 0:4 hesabı ilə uduzduqları matdan sonra təşkil olunan mətbuat konfransında deyib. 40 yaşlı mütəxəssis bildirib ki, oyuna ciddi itkilərlə çıxıblar. O, belə məğlubiyyətlərdən dərs çıxarmalarının gərəkliyini vurğulayıb:
"Futbolçularıma dedim ki, ruhdan düşməsinlər. Qarşıdakı oyunlara hazırlaşmalı, xal qazanmağa çalışmalıyıq ki, rəqiblərdən geri qalmayaq. "Qarabağ" son aylar yüksək tempdə oynayır və qələbələr qazanır".
Abbasov “köhlən atlar”la oyunda premyer-liqada debüt edən Emil Əliyevə güvənmələrinin səbəbini də açıqlayıb:
"Çempionata 5 stopperlə başlamışdıq. Elvin Bədəlov zədə səbəbindən demək olar, mövsümü qapayıb. Höccət Haqverdi vərəqə cəzası səbəbindən bu oyunu buraxmaq məcburiyyətində idi. Gənc Nihad Ağayevi oynatmağı düşünürdüm. O isə U-19-un toplanışından yeni dönüb. Belədə əvəzedici heyətdən Emil Əliyevi əsas komandaya dəvət etdim. Əvəzedici heyətdəki futbolçuları nəzərdən keçirdik. Emilin "Qarabağ" kimi komandaya oynaması çətin sınaq idi. Orta xətdə də problemimiz var. Murad Xaçayev cəzalıdı. Böyük komandalar kimi olmaq bizim üçün çox çətindi. Bununla belə əzmkarlıq göstərdik. Əlimizdəki gənclərdən yararlanmağa çalışırıq".
Baş məşqçi "Qarabağ"ın ötən mövsümdən dərs çıxardığını və hazırda yaxşı heyətə malik olduğunu söyləyib:
"Bu komanda ötən mövsümdəkindən daha yaxşıdı. Amma bu, o demək deyil ki, hər oyunda udmalıdılar. Məncə, "Neftçi" yenə də "Qarabağ"la çempionluq mübarizəsi aparacaq".
Abbasov bəzi futbolçuların bu dəfə milliyə çağırılmamasına belə münasibət bildirib:
"Mənim üçün sürpriz olmadı. Amma bəzi narahat şəxslər indi rahat yata bilərlər. Rəhim Sadıxova son oyunlar elə də şans verilmirdi. Hərə bir siyahı tərtib edə bilər. Baş məşqçinin verdiyi qərara nə deyə bilərəm?"
O, Murad Xaçayevə verilmiş 5 oyunluq cəza ilə bağlı apellyasiyanın qəbul edilməməsinə isə bu cür reaksiya verib:
"Baş məşqçilərin hakimlik barədə fikirlərini pis qəbul edirlər. Amma onları da başa düşmək lazımdı. Xaçayev son oyunlar yaxşı formada idi. Apellyasiya qəbul edilməyibsə, nə edək? Davam etməliyik".
