Bir neçə gün əvvəl Lautaro Martines ilə yeni müqavilə bağlayan “İnter”də daha bir oyunçunun məsələsi həllini tapıb.

Artıq Nikolo Barellanın komandada qalıb-qalmayacağı haqda şayiələr də mənasını itirib. Çünki italyan futbolçu klubda qalmağa qərar verib. Rəhbərlik Barella ilə yeni müqaviləni dünən rəsmiləşdirib. Yarımmüdafiəçi ilə razılaşdırılan sözləşmənin müddəti 2026-cı ilin yayına qədər nəzərdə tutulub. Onun məvacibi də artırılıb. Yeni anlaşmaya qədər illik maaşı 2,4 milyon avro olan Nikolo cari mövsümdə 4,5 milyon avro, növbəti 4 mövsümdə isə bonusları nəzərə almadan 5 milyon avro qazanacaq.

Rəhbərlik 24 yaşlı futbolçuya komandanın gələcək kapitanı gözü ilə baxır. Nikolo “İnter”də 2019-cu ildən çıxış edir. O, bu mövsüm bütün turnirlərdə iştirak etdiyi 15 oyunda 1 qolun və 6 məhsuldar ötürmənin müəllifi olub.