Lionel Messi Fransa çempionatının 13-cü turunun “Bordo” ilə matçını buraxacaq.

Bu barədə PSJ-nin mətbuat xidməti məlumat yayıb.
Argentinalı hücumçunun bud nahiyəsindəki narahatlıq səbəbindən müalicəsi davam edir. Xatırladaq ki, Messi zədə səbəbindən Çempionlar Liqasının qrup mərhələsinin bu həftə keçirilən “Leyptsiq”lə oyununu (2:2) da buraxmışdı. Lionel artıq zədəsinin müalicəsi üçün Madridə yollanıb. O, cümə axşamı ixtisaslaşmış TVA klinikasından çıxarkən diqqəti cəlb edib. Yeri gəlmişkən, ulduz futbolçu ilk dəfə 2015-ci ildə diz bağlarından aldığı zədəsini məhz bu klinikada müalicə etdirmişdi. Yerli mənbələrin xəbərinə görə, 34 yaşlı hücumçu burda DÇ-2022-nin seçmə mərhələsinin sentyabrda keçirilən Venesuela ilə matçından sonra onu narahat edən sol budundan iki seans terapiya da keçmişdi. Onu da qeyd edək ki, Messi DÇ-2022-nin seçmə mərhələsinin Uruqvay və Braziliya ilə növbəti oyunları üçün Argentina yığmasına çağırılıb. O, qarşıdakı matçlarda milli komandaya kömək etməkdə qərarlıdı.

Lionellə bağlı yayılan son xəbər daha cəlbedicidi. RTP-nin məlumatında onun bu il “Qızıl top”u 7-ci dəfə qazanacağı bildirilir. Bu mənbə artıq futbolçuya müsabiqənin qalibi olduğu haqda məlumat verildiyini qeyd edir. Messi artıq nüfuzlu mükafatın təsisçisi olan “France Football” həftəliyinə bu ilki laureat kimi müsahibə də verib. Xatırladaq ki, o, sona yaxınlaşan ildə Argentina yığmasıyla Amerika Kubokunda qalib gəlib. İspaniya çempionatında sabiq klubu “Barselona”nın formasında vurduğu 30 qolla ötən mövsümün ən yaxşı bombardiri olub. “Qızıl top” mükafatının təqdimat mərasimi noyabrın 29-da Parisdə təşkil ediləcək.