Qazaxıstan mətbuatı Ozobiçlə Şeydayevi fərqləndirdi
Konfrans Liqasının qrup mərhələsi çərçivəsində “Qarabağ” Almatıda “Kayrat”la üz-üzə gələcək.
Bu matç hər iki tərəf üçün böyük önəm daşıyır. Belə ki, ağdamlılar rəqibinə qalib gələrsə, qrupdan çıxmağı təmin edə bilər. Bununla da Qurban Qurbanovun komandası ölkə futbolunda yeni tarix yazaraq avrokuboklarda mərhələ adlayan ilk Azərbaycan klubu olacaq. Kurban Berdıyevin komandası isə növbəti mərhələ şansını davam etdirmək üçün “Qarabağ”ı mütləq məğlub etməlidi.
Bunu nəzərə alıb Qazaxıstan mətbuatına nəzər saldıq. “Spots.kz” saytında yer alan yazını təqdim edirik:
“Kayrat” Konfrans Liqasında 3 oyunda cəmi 1 xal qazanıb. Beləliklə, ikinci yer uğrunda mübarizədə şansının qalması üçün Almatı təmsilçisi “Qarabağ”a mütləq qalib gəlməlidi. Bu çətin olacaq. Çünki komanda son matçda Azərbaycan klubuna 1:2 hesabıyla uduzub. Bildiyiniz kimi, Qazaxıstan çempionatına ötən həftə yekun vuruldu. Son turda “Kayrat” “Jetisu” ilə heç-heçə etdi - 0:0. Almatılılar Qazaxıstan çempionatını 3-cü yerdə başa vurdu. Bu dəfə Vaqner Lavla Artur Şuşenaçevin mütləq meydanda olması lazımdı. Əks halda, komanda üçün avrokuboklar erkən başa çatacaq. Rəqib üçün isə vəziyyət daha yaxşıdı. Hətta müqayisəedilməzdi. Bu həftəsonu Azərbaycan çempionatında ağdamlılar uğurlu performans sərgilədilər. “Qarabağ” doğma meydanda hazırkı çempion “Neftçi”yə 4:0 hesabı ilə şallaq vurdu. “Köhlən atlar” ölkə çempionatında liderdi. Eyni zamanda, Qurban Qurbanovun komandası Konfrans Liqasında da çox yaxşı çıxış edir. İkinci yerdədilər və hesablarında 7 xal var. Bu, həlledici matçlar ərəfəsində yaxşı nəticədi. Çempionatda liderlik və avrokuboklarda yaxşı nəticələr, sözsüz ki, “Qarabağ”a güc və yeni motivasiya verəcək. Komandanın Almatıda qələbə üçün oynayacağı şübhə doğurmur. Hücumameyilli yarımmüdafiəçi Filip Ozobiç əla formadadı. Ramil Şeydayev də özünü yaxşı tərəfdən göstərir. Almatılılar üçün cari mövsüm uğursuz keçir. “Qarabağ”, şübhəsiz ki, hücumda fəal oynayacaq və istəyinə çatacaq. Qonaqlar daha güclü görünür, üstəlik, son matçlarda təsirli oyun nümayiş etdirirlər. Bizim proqnozumuz və qiymətimiz “Qarabağ”ın qələbəsidi”.
SƏNƏM FƏRHADOVA
