Konte “Tottenhem”ə gəldi, Keyn fikrini dəyişdi
Bazar ertəsi baş məşqçi Nunu Eşpiritu Santu ilə yolları ayıran “Tottenhem”də yeni çalışdırıcının təyinatı rəsmiləşib.
Gözlənildiyi kimi, “mahmızları” bundan sonra Antonio Konte çalışdıracaq. Xatırladaq ki, Santu paytaxt komandasına iyunun 30-da təyinat almışdı. Londonlularla əməkdaşlığı 4 ay çəkən portuqaliyalı mütəxəssisin müqaviləsinin ləğvi ona 16,5 milyon avro təzminat qazandırıb. İngiltərədə daha əvvəl 4 il “Vulverhempton”u çalışdıran 47 yaşlı Santunun uğursuz nəticələrə görə vəzifəsindən azad ediləcəyi gözlənilirdi. “Tottenhem” premyer-liqada 10 oyuna 15 xal toplamaqla turnir cədvəlində 9-cu yeri tutur. Komandanın bütün turnirlərdə keçirdiyi son 4 matçda 3 dəfə uduzması rəhbərliyi Santunun bütün köməkçilərinə də qapını göstərməyə vadar etmişdi.
London klubu baş məşqçi problemini qısa zamanda Kontenin sayəsində yoluna qoyub. İtalyan mütəxəssis ilə müddəti 2023-cü ilə qədər nəzərdə tutulan müqavilə bağlanıb. Anlaşmada müddətin sonradan uzadılmasının mümkünlüyü ilə bağlı bənd də mövcuddu. Bir neçə gün əvvəl qeyri-rəsmi mənbələr paytaxt klubunun Konteyə illik 18,3 milyon avro maaş təklif etdiyini xəbər vermişdi. Qeyd edək ki, “Tottenhem” onu bu yay sıralarına qatmağa çalışsa da, anlaşma baş tutmamışdı. İngiltərədə 2016-18-ci illərdə “Çelsi”ni çalışdıran və bu komandanı 2016/17 mövsümündə çempionluğa daşıyan apenninlinin sonuncu iş yeri “İnter” olub. Bu komandanı iki il çalışdıran 52 yaşlı məşqçi milanlıları ötən mövsüm A seriyasında çempionluğa daşıyıb.
Vətənində daha əvvəl “Yuventus”la ardıcıl üç dəfə (2012-14) çempion olan Konte “Tottenhem”ə təyinatı ilə bağlı bunları deyib: “Yenidən məşqçilik fəaliyyətinə qayıtdığım, xüsusilə də premyer-liqa klubu ilə anlaşdığım üçün çox şadam. “Tottenhem” ultramüasir infrastruktura və dünyada ən yaxşılardan olan stadiona malikdi. Komandaya və azarkeşlərə məni həmişə məşqçi və futbolçu kimi xarakterizə edən ehtirasımı, xarakterimi və hədəfə çatmaq uğrunda yorulmaz səylərimi ötürmək üçün yeni işimə başlayacağım günü səbirsizliklə gözləyirəm. Yayda əməkdaşlığımız baş tutmamışdı, ona görə ki, onda “İnter”i yenicə tərk etmiş və son mövsümün emosiyalarından ayrıla bilməmişdim. Bu səbəbdən məşçilik fəaliyyətimə bir qədər fasilə verməyi lazım bilmişdim. Lakin yenidən bu sahədə çalışmaq istəyim və klubun prezidenti Deniel Levinin qətiyyəti komandanı indi qəbul etməyimə çox təsir etdi. Bu imkanı növbəti dəfə qazanarkən heç bir şübhə olmadan dəyərləndirməyə razılaşdım”.
Yeri gəlmişkən, Kontenin təyinatı aparıcı futbolçulardan Harri Keynin komandadan ayrılmaqla bağlı fikrini dəyişib. “The Sun” qəzetinin yazdığına görə, 28 yaşlı hücumçu artıq klubunu dəyişmək fikrindən daşınıb. Bir müddət əvvəl onun “Mançester Siti”yə keçəcəyi haqda xəbərlər yayılmışdı. Harri “Tottenhem”in Kontenin başçılığı altında titullar qazana biləcəyinə ümid edir.
