“Araz-Naxçıvan” Çempionlar Liqasının əsas mərhələsində bu gün ikinci oyununa çıxib.

Təmsilçimiz Rumıniya çempionu ilə qarşılaşıb. “Araz-Naxçıvan” Rumıniya çempionu “Yunayted Qalati” ilə qarşılaşıb. İlk matçdan fərqli olaraq bu dəfə Xətai Bağırov heyətdəki yerini almışdı. Oyuna təmsilçimiz üstün başladı. 2-ci dəqiqədə Xətai dönüşünü qolla qeyd etməyə yaxın oldu. O, qapıçını keçsə də, vacib olanı - qapıya düşməyi bacarmadı. Davidin 4-cü dəqiqədəki zərbəsi isə dəqiq alındı. İkinci “dördlük” də meydana çıxışını qolla qeyd etdi. Bu dəfə Maneka toru silkələməyi bacardı. Ardıcıl qollardan sonra rəqib fərqi minimuma endirdi. Araujo qolun müəllifi oldu. Braziliyalı 17-ci dəqiqədə dubl etməklə hesabı da bərabərləşdirdi. Amma fasiləyə “Araz-Naxçıvan” üstün yollandı. Murilo 17 saniyə qalmış komandamızın 3-cü qolunu vurdu. İkinci hissədə Felipinyo, Xətai, David bir neçə epizodda fərqi artırmaq şansını qaçırdı. 36-cı dəqiqədə rəqib meydanda azlıqda qaldı. Octavian Kires Ramiz boş qapıya zərbə endirən zaman ona qarşı kobud oynadı və meydandan qovuldu. Cəmi 15 saniyə kifayət etdi ki, təmsilçimiz üstünlüyünü 2 topa çatdırsın. İsa qapıya zərbə endirməyə cəhd etsə də, zərbəsi ötürmə kimi alındı. Qapı qarşısında nəzarətsiz qalan David bu hədiyyədən məmnuniyyətlə faydalandı. Sonrakı 1 dəqiqə ərzində tərəflər hərəyə bir dəfə də fərlənmək imkanı qazandı. Araujo het-trik etdisə, Felipinyo oyunda özünün qol hesabını açdı.

Çempionlar Liqası, əsas mərhələ
Araz-Naxçıvan - Yunayted Qalati (Rumıniya) 5:3 (3:2)
David Qustavo, 3:30, 35:38, Maneka 5:20, Murilo Borges,19:43, Felipinyo, 36:50 - Daniel Araujo, 6:58, 16:48, 36:37
Hakimlər: Deyan Veseliç (Sloveniya), Ozan Soykan (Türkiyə), Yosip Barton (Şimali Makedoniya).
Saniyəölçən: Denis Kutsi (Ukrayna).
Hakim-inspektor: Patrik Villemark (Belçika).
UEFA nümayəndəsi:  Stefan Kammerer (Almaniya).
29 oktyabr. İvano-Frankovsk.