“Barselona”ya müvəqqəti baş məşqçi təyin olunub.

İspaniya klubunun yaydığı xəbərə görə, əsas komandanı müvəqqəti olaraq Serxi Barxuan çalışdıracaq. Klubun prezidenti Xuan Laporta bu gün Barxuanı komandaya təqdim edib. “Barselona”nın yetirməsi olan 49 yaşlı mütəxəssis bu gün istefaya göndərilən baş məşqçi Ronald Kumanın səlahiyyətlərini yerinə yetirəcək. Klubun ikinci komandası “Barselona B”nin baş məşqçisi olan Barxuan yeni çalışdırıcının təyinatına qədər əsas komandada işləyəcək.
Kuman müqaviləsinin vaxtından əvvəl pozulmasına görə 12 milyon avro təzminat alacaq. Niderlandlı mütəxəssisin yerini daimi əsasda tutmağa əsas namizəd sayılan Xavi Ernandesin təyinatı noyabr ayında rəsmiləşəcək. Adını kataloniyalıların tarixinə böyük hərflərlə yazan 41 yaşlı məşqçinin son iki ildə çalışdırdığı “Əl-Sədd”i tərk edəcəyi üçün Qətər klubuna 1 milyon avro təzminat ödəniləcək.