Dünən Almaniya kubokunun 2-ci, daha dəqiq desək 1/16 final mərhələsində tarixi bir nəticə qeydə alındı.

Son oyunlarda qarşısına çıxanı darmadağın edən, bundesliqada ilk 9 tura 33 qol vurmaqla yeni rekord müəyyənləşdirən ''Bavariya'' özü darmadağın oldu. Münhen nəhəngi əsas heyətlə oynamasına baxmayaraq Munhenqladbax ''Borussiya''sı ilə səfər oyununda gözlənilmədən 5 cavabsız qol buraxaraq, həm öz fanatlarını, həm də futbol dünyasını şoka saldı! Maraqlıdı ki, ''rekordmayster'' ardıcıl 2-ci mövsüm mübarizəni bu mərhələdə dayandırmalı oldu. Ötən mövsüm isə sensasiyanın müəllifi penaltilər seriyasında qalib gələn 2-ci bundesliqa təmsilçisi ''Holştayn'' olmuşdu. ''Bavariya''nın ardıcıl 2 mövsüm kubokda 1/8 finala qədər irəliləyə bilməməsinə sonuncu dəfə 1994/95 və 1995/96 mövsümlərində rast gəlinmişdi. Bundan başqa komanda son 43 ildəki ən böyükhesablı məğlubiyyətini yaşadı. Çünki 1978-ci ildə ''Fortuna''ya 1:7 hesabı ilə uduzduqdan sonra ''Bavariya'' heç bir rəsmi oyunda 5 və ya daha artıq top fərqi ilə yenilməmişdi. Və nəhayət, münhenlilərin möhtəşəm qol seriyasının 86-cı rəsmi oyunda qırıldığını da bildirək. Komanda son 85 rəsmi matçın hamısında ən azı 1 qol vurmağı bacarmışdı. Bu nəticə Avropa rekordunu ələ keçirmək üçün kifayət etdi. Amma ''River Pleyt''ə məxsus dünya rekordunu (96 oyun) yeniləmək mümkün olmadı.