Bir neçə həftə əvvəl Səudiyyə Ərəbistanının sərmayə fonduna satılan “Nyukasl”da böyük dəyişiklər gözlənilir.
Bilindiyi kimi, İngiltərə klubunun yeni rəhbərliyi baş məşqçi axtarışlarına başlayıb. Bunun səbəbi Stiv Bryusun artıq bu vəzifədən istefaya göndərilməsi ilə bağlıdı. Xatırladaq ki, yeni rəhbərlik hələ ki müqaviləsinin vaxtından əvvəl pozulmasına görə 8 milyon funt sterlinq təzminat ödədiyi 60 yaşlı mütəxəssisin yerinə heç kimi təyin etməyib.
Bu planda axtarışlarını davam etdirən ərəb həmsahiblərin yaxın gələcəklə bağlı daha bir layihəsi var: “Sent Ceyms Park”ın adı dəyişdirilə bilər. “Daily Mail” qəzetinin yazdığına görə, rəhbərlik hazırda komandanın ev oyunlarını keçirdiyi stadionun ad hüququnun satışa çıxarılmasını müzakirə edir. Amma məlumatda bu planda hər hansı qərarın yerli azarkeşlərin razılığı əsasında veriləcəyi də bildirilir. Qeyd edək ki, “Nyukasl”ın doğma stadionu 52305 tamaşaçı tutumuna malikdi.
